Papa na fton të lutemi në gusht për DBR-së të Madridit, ku sot mbërrini simboli Kryqit
Prej ditës së sotme Madridi pret simbolin e takimit botëror të rinisë. “Druri i Kryqit”
që Papa Wojtila ia besoi të rinjve më 1984, së bashku me ikonën e Virgjërës Mari,
së pari do të përshkoi famulli kishtare të ndryshme për të arritur në Cuatro Vientos
për Ditët kulmore të Rinisë."Të lutemi që Dita Botërore e Rinisë, e cila do
të kremtohet në Madrid, t’i inkurajojë gjithë të rinjtë e botës ta rrënjosin e ta
themelojnë jetën e tyre në Krishtin” – ky është ndjeti i përgjithshëm i lutjes së
Benediktit XVI për muajin gusht. Papa i fton besimtarët të luten për të rinjtë, që
do të marrin pjesë në DBR-së. Për këtë ndjet të Atit të Shenjtë flet në mikrofonin
tonë, don Nikolò Anselmi, drejtor i Shërbimit për baritorinë rinore, pranë
Konferencës ipeshkvnore italiane:
Përgjigje: - Sipas dëshirës
së Gjon Palit II, e pastaj edhe të Benediktit XVI, DBR-së, janë, mbi të gjitha, shtegtim
misionar: prandaj Papa i quan misionarë të rinjtë, që do ta shoqërojnë në shtegtimin
e tij apostolik drejt Spanjës. Në mesazhin drejtuar të rinjve, Papa i fton ta shikojnë
Krishtin si themel e rrënjë të jetës së tyre. Më duket se – duke folur edhe me të
rinjtë, që e lexuan, e medituan e u lutën me animatorët e drejtuesit e baritorisë
rinore – një nga fragmentet më të bukura, që flet për rrënjosjen në Krishtin, thekson
dëshirën për ta pasur gjithnjë Zotin pranë, në çdo çast të jetës. E kjo nuk është
vetëm dëshirë e të rinjve, por edhe e vetë Zotit. Është Ai, që dëshiron i pari ta
rrënjosë vetveten në zemrat e tyre.
Pyetje: - Në mesazhin e DBR-së,
Papa, duke iu drejtuar të rinjve, pohon: “Kisha i var shpresat tek ju”: A e ndjejnë
të rinjtë këtë përgjegjësi kaq të madhe ndaj Kishës?
Përgjigje: -
Mendoj se po. Në të vërtetë shprehja “Kisha i var shpresat tek ju”, është ftesë drejtuar
të rinjve, që të mos jenë vetëm subjekt i veprimtarisë baritore, por, kryesisht, protagonistë.
E kështu edhe është, sepse në shoqatat tona, në oratore, në grupet rinore, në katekizëm,
në animacionin liturgjik, të rinjtë impenjohen shumë, janë një pjesë e mirë e jetës
së Kishës. Dua të theksoj se Kisha nuk mbyllet vetëm brenda mureve të famullive, të
dioqezeve e të shoqatave, por del vazhdimisht në ‘fushë të mejdanit’, në botë. Të
rinjtë po marrin gjithnjë më shumë pjesë në jetën shoqërore–politike. Edhe Ati i Shenjtë,
së bashku me ipeshkvijtë tanë, kanë theksuar disa herë se duhet krijuar një brezni
e re politikanësh katolikë, të rinjsh, që marrin pjesë gjallërisht në jetën shoqërore.
Besoj se si mesharët, ashtu edhe besimtarët, mund të bëjnë më shumë për t’u lënë më
tepër hapësirë të rinjve në bashkësitë tona të krishtera, duke nisur nga dëgjimi gjithnjë
më i vëmendshëm i kërkesave të tyre, duke e marrë vesh më mirë gjuhën e tyre, mënyrën
si e kuptojnë Ungjillin e si e vënë në jetë. E unë i ftoj të rinjtë të hyjnë si fllad
i freskët në të gjitha mjediset e Kishës e të shoqërisë, duke i rinuar, me rininë
e tyre.
Pyetje: - Këlni, Sidnei, Madridi… Edhe për Benediktin XVI,
si për paraardhësin e tij, që e shpiku, Dita Botërore e Rinisë bëhet çast i fortë
feje, përmasë, që lë gjurmë në të gjithë papninë…
Përgjigje: -
Edhe unë isha i pranishëm në Këln e mora pjesë në emocionin e Atit të Shenjtë, të
sapo zgjedhur, që shikonte para vetes një oqean prej një milion të rinjsh. Pas këtij
emocioni të parë, më duket se Papa ka krijuar lidhje të fuqishme me të rinjtë. Në
të gjitha shtegtimet e tij apostolike, parashikon gjithnjë takime me ta dhe di t’u
drejtojë përherë fjalë të thjeshta e të thella, siç është gjithë stili i tij; fjalë,
përmes të cilave i inkurajon ta pranojnë Jezusin e të jenë protagonistë të jetës së
tyre. Të rinjtë e ndjekin pas me dëshirë Benediktin XVI, ashtu si ndiqnin Gjon Palin
II, pas të cilit përshkuan, vite me radhë, shtigjet e mbarë Planetit.