У сённяшняй праграме
я хачу паразмаўляць аб такой важнай і актуальнай у сучасным свеце праблеме, як карупцыя.
Гэта грамадская загана не застаецца па-за ўвагай каталіцкага навучання. Аб карупцыі
і яе негатыўных наступствах кажа Кампендыўм cацыяльнага навучання. Акрамя таго, Папская
Рада “Iustitia et pax”(“Справядлівасць і мір”) праводзіла некалькі міжнародных канферэнцый,
прысвечаных барацьбе з карупцыяй, у якіх прымалі ўдзел прадстаўнікі міжнародных арганізацый,
даследчыкі і філосафы, дыпламаты, універсітэцкія выкладчыкі і эксперты. Мэтай гэтых
канферэнцый было лепш пазнаёміцца з фенаменам карупцыі, абмеркаваць найбольш эфектыўныя
спосабы для барацьбы з ёй і ўдакладніць, які ўклад можа зрабіць Касцёл у гэтай ініцыятыве.
Актуальнасць праблемы карупцыі
Фенамен карупцыі існаваў заўсёды,
аднак на працягу апошніх гадоў ён стаў адной з самых балючых праблем для многіх краін
свету. Найбольшая ўвага да праблемы карупцыі, найбольшая колькасць дакументаў, прысвечаных
гэтай тэме, тычыцца сферы міжнародных адносін і перш за ўсё міжнароднага гандлю і
фінансавага абароту. Гэта азначае, што карупцыя не ведае межаў і сёння ахоплівае ўвесь
свет. На распаўсюджванне карупцыі на міжнародным узроўні паўплывалі шматлікія гістарычны
фактары, сярод якіх найбольш важнае значэнне мелі: разбурэнне ідэалагічных блокаў
у 1989 г. і глабалізацыя інфармацыі. З аднаго боку, адсутнасць межаў адкрыла дзверы
для распаўсюджвання карупцыі, а з іншага, стварыла ўмовы для большай, салідарнай барацьбы
з ёй.
Карупцыя не ведае межаў
Карупцыя не ведае палітычных і
геаграфічных межаў. Яна прысутнічае ў багатых і бедных краінах. Акрамя таго, карупцыя
прысутнічае на ўсіх сацыяльных узроўнях: не толькі ў сферы эканомікі ці палітыкі,
але таксама і ў грамадскай.
На яе распаўсюджванне ўплываюць адсутнасць празрыстасці
ў фінансавых сістэмах і перамяшчэнні фінансавых патокаў, існаванне шляхоў атрымання
нячыстых даходаў, слабое супрацоўніцтва паміж дзяржавамі ў справе барацьбы з карупцыяй,
існаванне розных юрыдычных нормаў. Сёння карупцыя найчасцей звязана з гандлем наркотыкамі,
адмываннем грошай, гандлем зброяй і з рознага роду крымінальнай дзейнасцю. Варта адзначыць,
што на развіццё карупцыі ўплываюць малая увага СМІ да гэтай праблемы (у некаторых
краінах) і адсутнасць дэмакратыі. Без свабодных СМІ, дэмакратычных прыладаў кантролю
і празразрыстасці, карупцыя распаўсюджваецца значна хутчэй.
Карупцыя нясе
нематэрыяльны цяжар
Карупцыя з’яўляецца цяжарам не толькі для матэрыяльнай
сферы, г.зн., запавольвае эканамічны рост, але таксама і для нематэрыяльнай, звязанай
перш за ўсё з якасным і чалавечым вымярэннем грамадскага жыцця. Палітычная карупцыя,
як кажа Кампендыўм сацыяльнага навучання Касцёла, “перашкаджае правільнаму функцыянаванню
дзяржавы; негатыўна ўплывае на адносіны паміж кіраўнікамі і народам; спрыяе росту
недаверу да палітычных інстытутаў, паступова выклікаючы апатыю грамадзян да палітычнага
жыцця і прадстаўнікоў улады, у выніку чаго інстытуты слабеюць”. Такім чынам, карупцыя
не толькі перашкаджае эканамічнаму развіццю краіны, але таксама жыццю чалавека і грамадства,
якое становіцца менш справядлівым і больш закрытым.
Карупцыя – грэх супраць
агульнага дабра
Касцёл разглядае карупцыю як вельмі цяжкую прычыну дэфармацыі
палітычнай сістэмы. У Кампендыўме сацыяльнага навучання гаворыцца, што “карупцыя радыкальна
скажае ролю прадстаўнічых інстытутаў, таму што яны выкарыстоўваюцца ў якасці арэны
палітычнага гандлю паміж кліентам з яго патрэбамі і ўладай, гатовай аказваць паслугі.
Такім чынам, палітычныя рашэнні прымаюцца толькі ў інтарэсах людзей, якія маюць сродкі
для таго, каб паўплываць на гэтыя рашэнні, і перашкаджаюць ажыцяўленню агульнага дабра
ўсіх грамадзян”.
Карупцыя забірае ў людзей іх фундаментальнае агульнае дабро,
а менавіта законнасць: у сферы агульных правілаў, адкрытасці, правільнага функцыянавання
эканамічных і палітычных інстытутаў. Законнасць неабходна, каб устанаўліваць адносіны
паміж грамадствамі, развіваць эканамічнае і палітычнае жыццё. Законнасць, будучы сапраўдным
“агульным дабром” з’яўляецца правам усіх народаў. Таму карупцыя павінна быць знішчана,
каб не забіраць у людзей гэта права.
Для таго, каб перамагчы карупцыю, пазітыўным
з’яўляецца пераход ад аўтарытарнага строю да дэмакратычнага, ад закрытага грамадства
да адкрытага, ад вертыкальнага да гарызантальнага, ад цэнралізаванага да грамадства,
у жыцці якога прымаюць удзел усе грамадзяне. Канешне, гэты пераход не прыводзіць аўтаматычна
да пазітыўных вынікаў. Даследванні паказваюць, што развітыя дзяржавы таксама, як і
больш архаічныя, маюць высокі ўзровень карупцыі. У аўтарытарных краінах прасачыць
узровень карупцыі вельмі цяжка з-за іх закрытасці, але таксама і ў дэмакратычных,
часта гэты фенамен вельмі добра схаваны і нават абаронены.
У нашай праграме
праз тыдзень мы пагаворым аб некаторых указаннях якія робіць сацыяльнае навучанне
Касцёла ў сферы барацьбы з карупцыяй.