Լուսանկարային Վահանակ՝ Արցախի Եւ Արցախցիներուն Մասին։
Լեռնային Ղարաբաղի Հանրապետութեան հռչակման 20-ամեակին առիթով Արցախի արտաքին գործոց
նախարարութեան շէնքին մէջ բացումը կատարուեցաւ լուսանկարային վահանակի մը` նուիրուած
ղարաբաղեան ազգային-ազատագրական շարժման արդի հանգրուանին: Արտաքին գործոց նախարարութեան
մամլոյ ծառայութեան տեղեկութեանց համաձայն, ներկայացուած են Արցախի Հանրապետութեան
պետականութեան խորհրդանիշը, քարտէսը, համառօտ տեղեկատուութիւն Լեռնային Ղարաբաղի Հանրապետութեան
վերաբերեալ, լուսանկարային նիւթեր, որոնք կը պատմեն ղարաբաղեան շարժման, ի պատասխան արցախցիներու
խաղաղ պահանջներուն` Ազրպէյճանի կողմէ սանձազերծուած պատերազմին, ազրպէյճանական-ղարաբաղեան
տագնապի լուծման բանակցային հոլովոյթին, երկրամասի բնութեան եւ տեսարժան վայրերուն, յետպատերազմեան
կեանքին եւ վերաշինութեան հոլովոյթին, կեանքի տարբեր մարզերուն մէջ Արցախի ժողովուրդին
ձեռքբերումներուն մասին եւ այլն: Զբօսաշրջիկներու համար նախատեսուած յատուկ անկիւնին
մէջ զետեղուած է տեղեկատուութիւն` հանրապետութեան տարածք մուտքի եւ ելքի կարգի, պանդոկներուն
մասին, ինչպէս նաեւ այլ օգտակար տեղեկութիւններ: