Бэнэдыкт XVI духоўна яднаецца са стратай Касцёла ў Беларусі
Бэнэдыкт XVI скіраваў
спачувальную тэлеграму на імя Біскупа Гродзенскага Аляксандра Кашкевіча, старшыні
Канферэнцыі Каталіцкіх Біскупаў у Беларусі ў сувязі са смерцю кардынала Казіміра Свёнтка.
“З
вялікім болем я прыняў навіну аб смерці арцыбіскупа Мінска-Магілёўскага на пенсіі
і былога Апостальскага Адміністратара Пінскай дыяцэзіі кардынала Казіміра Свёнтка.
Узношу малітвы да Бога, каб Ён даў вечны адпачынак гэтаму дбайнаму і шчыраму пастыру”,
- напісаў Папа. “Я духоўна яднаюся з болем дыяцэзіяльнай супольнасці, у якой ён з
вялікім клопатам здзейсняў сваё біскупскае служэнне. Я ўзгадваю аб адважным сведчанні,
якое ён даў Хрысту і свайму Касцёлу ў асабліва цяжкія часы, а таксама аб энтузіязме,
з якім працаваў дзеля духоўнага адраджэння сваёй краіны”, - напісаў у тэлеграме Бэнэдыкт
XVI.
Папа выказаў спачуванні таксама арцыбіскупу Мінска-Магілёўскаму і Апостальскаму
Адміністратару “Ad nutum sanctae sedis” Пінскай дыяцэзіі, Мітрапаліту Тадэвушу Кандрусевічу,
усяму беларускаму епіскапату, манаскім супольнасцям, і усім вернікам “якіх кардынал
вельмі любіў і якім служыў ад ўсяго сэрца”. “Дасылаю вам сваё апостальскае благаслаўленне,
як знак веры і хрыціянскай надзеі ва Уваскрослым Пану”, - напісаў у сваёй спачувальнай
тэлеграме Святы Айцец.