«Թուրքիոյ Տեղանուններուն Մեծ Մասը Հայկական Ծագում Ունին » Կը Գրէ «ԹԱՐԱՖ»
Թրքական Օրաթերթը։
Թրքական «Թարաֆ» օրաթերթը կը գրէ, որ Թուրքիոյ մէջ քարտէսները տպագրուելէ առաջ խիստ գրաքննութեան
կ՛ենթարկուին` աւելցնելով, որ աշխարհի որեւէ այլ երկրի մէջ աշխարհագրական անուններու
այդքան փոփոխութիւններ չեն կատարուած, որքան Թուրքիոյ մէջ: Օրաթերթը կը յայտնէ, որ
տեղանուններու ամէնէն շատ փոփոխութիւններ կատարուած են Թուրքիոյ հիւսիս-արեւելքը` Սեւ
ծովու ծովեզերեայ շրջաններուն մէջ, ինչպէս նաեւ հարաւ-արեւելքին մէջ, ուր կը գերակշռէ
քիւրտ բնակչութիւնը: Ըստ օրաթերթին, ատիկա իշխանութիւններուն ամէն ինչ թրքացնելու
հետեւողական, միտումնաւոր քաղաքականութիւնն է: Իսկ քիւրտերը յամառ կերպով կը պահանջեն
վերականգնել հին տեղանունները: Թրքական օրաթերթը նաեւ կը նշէ, որ թէեւ քիւրտերը, օրինակ`
Նորաշէն անունը քրտերէն կը նկատեն, սակայն անիկա հայերէն է եւ կը նշանակէ նոր շինութիւն:
«Թարաֆ» նաեւ կը յիշեցնէ, որ Թուրքիոյ տեղանուններուն մեծ մասը հայկական ծագում ունի: