Në Madrid arrin Kryqi i Ditës Botërore të Rinisë; priten më se një milion të rinj.
Madridi bën përgatitjet e fundit për të pritur Papën dhe të rinjtë që do të marrin
pjesë në DBR-së 2011. Vetëm një muaj na ndan nga 16 gushti, dita e parë e takimit
të madh. Kremtimet kryesore papnore do të mbahen në aerodromin e Cuatro Vientos, ku
Benedikti XVI do të kryesojë një mbrëmësore, të shtunën, më 20 gusht, pasuar nga Mesha
e së dielës, kulm i festës së madhe rinore. Protagonistë, edhe Sheshi i Cibeles, ku
do të kremtohet Mesha e hapjes së takimit e pritja e Papës, më 18 e, sidomos, ashtu
si në takimet e mëparshme, Udha e Kryqit, më 19 gusht. Numri i vullnetarëve, sipas
drejtorit ekzekutiv të DBR-së Madridit, Yago de la Cierva, deri tani ka arritur në
30 mijë vetë. Në këtë atmosferë, në kryeqytetin spanjoll arritën Kryqi dhe Ikona e
DBR-së, që u pritën me një mbrëmësore lutjesh, kryesuar nga kryipeshkvi i Madridit,
kardinali Antonio Maria Ruoco Varela. Për hollësitë, në mikrofonin tonë, Marieta
Jaureguizar,drejtoreshë e Zyrës së shtypit të DBR-së:
Përgjigje:
- Pritja e Kryqit dhe e Ikonës së DBR-së, që përshkuan 63 dioqezat spanjolle,
duke bërë më se 19 mijë kilometra udhë, ishte tejet emocionante. Të gjithë të rinjtë
e Madridit, të pranishëm në katedrale, e ishin shumë, e pritën me entuziazëm, sepse
kjo festë shënon afrimin e ditës së tyre të madhe të takimit me të rinj nga mbarë
bota, pikërisht nën hijen e Kryqit. Kryeipeshkvi i Madridit, kardinali Varela, u foli
të rinjve me një entuziazëm, që i preku të gjithë. Theksoi posaçërisht se DBR-së është
burim gëzimi e krenarie për dioqezën e Madridit, organizatore e një feste kaq të madhe.
Pyetje: - Ç’mund të na thoni për arritjet e deritanishme organizative?
Sa vetë janë regjistruar?
Përgjigje: - Organizimi nisi dy
vjet më parë e tani po punojnë me vrull të veçantë të 16 zonat operative. Të gjitha
strukturat janë mbyllur e mungon akoma vetëm konkretizimi i disa hollësive. Deri tani
janë regjistruar 420 mijë të rinj, por puna vijon e ne mendojmë se numri do ta kalojë
milionin. Një kuriozitet: sot u regjstruan më shumë të rinj italianë, sesa spanjollë.
E kjo, sepse ngarendin të regjistrohen më shumë ata, që kanë nevojë për strehim. Pas
italianëve, vijnë të rinjtë francezë e ata amerikanë. Janë shkruar të rinj nga 193
vende të botës. Prandaj mund të themi se do të vijnë nga mbarë bota. Ndërkaq, në Spanjë
ne vijojmë punën për t’i nxitur të rinjtë, ndonëse nuk ka shumë nevojë për nxitje.
Realiteti tregon se do të përfaqësohen me shumicë të gjitha famullitë e vendit, lëvizjet,
kolegjet. Shumë prej tyre tanimë janë në pritje të ngjarjes së madhe, takimit me Papën
Benedikti XVI.
Pyetje: - Edhe famullitë e familjet e Madridit do
t’i presin të rinjtë, që do të vijnë nga të katër anët? Përgjigje: -
Natyrisht. Nuk është gjë e lehtë të strehosh më se 300 mijë të rinj. Drejtori i turizmit
pohoi se hotelet e Madridit kanë kapacitet për 70 mijë vende. Prej këndej, ishte më
se domosdoshme të mobilizoheshin famullitë, familjet, sepse të rinjtë duhet të jenë
këtu si në shtëpinë e vet. Prej muajsh punohet që kolegjet, qendrat sportive, famullitë,
hapësirat e caktuara nga administrata publike e private, të kthehen në bujtina, të
përshtatshme për të rinjtë. Jemi përgatitur me gjithë entuziazmin e botës, sepse presim
një botë të tërë! Më se 250 vetë, nga të cilët 80% vullnetarë, punojnë që mysafirëve
tanë të rinj të mos u mungojë asgjë gjatë ditëve, që do t’i kalojnë mes nesh. Duhet
që të rinjtë të mos shqetësohen për asgjë; ta jetojnë Ditën e tyre si takim feje,
takim me Krishtin, takim mrekullisht të bukur, të paharrueshëm. Shpresojmë se edhe
tek ne do të përsëritet mrekullia e DBR-së së Sidneit, në Australi. Nuk ka takim tjetër,
sportiv a kulturor qoftë, që mund ta shndërrojë jetën e të rinjve, si ky që pritet.
E ne shpresojmë se kështu do të jetë edhe takimi i madh i Madridit.