U mbajt këto ditë në Kirkuk një konferencë ndërfetare me temë: “Së bashku, të forcojmë
bashkëjetesën në Irak”. Takimi u kryesua nga kryeipeshkvi i qytetit, imzot Luis Sako,
i cili ishte edhe organizator i konferencës, së bashku me Shoqatën për popujt e kërcënuar
të Erbilit (Kurdistan). Në të morën pjesë rreth 150 krerë fetarë e politikë nga bashkësitë
e krishtera e myslimane, nga etnitë kurde, arabe, turkomane, kalde asire jazida, mande.
Tema e bashkëjetesës u analizua në planin shoqëror, edukativ, psikologjik e fetar. “Iraku
– theksoi imzot Sako – përbëhet nga grupe të ndryshme, në një mozaik kulturash, qytetërimesh,
fesh, sektesh e gjuhësh të shumëllojshme. Të gjithë bartin një pasuri, që i lidh thellësisht
me njëri-tjetrin. Vendi ka nevojë për një model kulturor e shoqëror, në gjendje të
nxisë bashkimin përmes pluralizmit, tolerancës e harmonisë ndërmjet feve dhe etnive”.
Sipas kryeipeshkvit të Kirkukut, fetë duhet të mësojnë si të jetojnë së bashku e politika,
e ndarë nga kulti, duhet të hartojë një kushtetutë, ku të garantohen të drejta dhe
detyra të barabarta për të gjithë. Së fundi, imzot Sako u ndal te sistemi edukativ:
është e rëndësishme – theksoi ai – të shlyhen nga programet shkollore shprehje, që
i ftojnë nxënësit të urrejnë, apo të diskriminojnë një grup fetar në favor të një
tjetri.