ՄԻՆՍՔ-ի Խմբակի Համանախագահները Սարգսեանի Մօտ։

Երէկ Հայաստանի նախագահ Սերժ Սարգսեան ընդունեց շրջանային այցելութեամբ Երեւան ժամանած ԵԱՀԿ-ի Մինսքի խմբակի համանախագահներ Պեռնար Ֆասիէն (Ֆրանսա), Ռոպըրթ Պրատքէն (Միացեալ Նահանգներ), Իկոր Փոփովը (Ռուսիա) եւ ԵԱՀԿ-ի գործող նախագահի անձնական ներկայացուցիչ Անճէյ Քասփրչիքը:
Հանդիպման ընթացքին քննարկուեցան Լեռնային Ղարաբաղի տագնապի բանակցային հոլովոյթի ներկայ հանգրուանին վերաբերող հարցեր:
Երէկ աւելի կանուխ Հայաստանի արտաքին գործոց նախարար Էդուարդ Նալբանդեան եւս ընդունեց շրջանային այցելութեան շրջագիծին մէջ Երեւան ժամանած ԵԱՀԿ-ի Մինսքի խմբակի համանախագահները եւ Անճէյ Քասփրչիքը:
Հանդիպման ընթացքին շարունակուեցան քննարկումները արցախեան հիմնախնդիրի խաղաղ լուծման բանակցային հոլովոյթին մէջ յառաջընթաց արձանագրելու նպատակով նախատեսուող քայլերուն վերաբերեալ:
Համանախագահները Հայաստանի արտաքին գործոց նախարարին ներկայացուցին Պաքուի մէջ ունեցած իրենց հանդիպումներէն ստացուած տպաւորութիւնները: