Германія: у Мюнхене створаны цэнтр абароны дзяцей і моладзі
Пасля скандалаў адносна
злоўжыванняў некаторых святароў адносна дзяцей, Каталіцкі Касцёл Германіі пастанавіў
стварыць у Мюнхене “Цэнтр абароны дзяцей і моладзі”. Аб гэтым паінфармаваў 18 ліпеня
мясцовы ардынарый, кардынал Рэйнхард Марк. Працу гэтага навуковага цэнтра будуць каардынаваць
архідыяцэзія Мюнхен-Фрайзінг і Папскі Грыгарыянскі ўніверсітэт у Рыме.
Дырэктарам
новай установы стане дзіцячы псіхіятр Ульмскага ўніверсітэта, доктар Хуберт Лібхардт.
Цэнтр пачне сваю працу на пачатку 2012 г. У рамках яго дзейнасці плануецца распрацаваць
праграму дыстанцыйнага навучання на некалькіх мовах з мэтай стварэння групы супрацоўнікаў,
якія будуць працаваць у рамках Касцёла дзеля прадухілення сексуальнага выкарыстання
дзяцей.
“З гэтым праектам Касцёл бярэ адказнасць за свае дзеянні”, - сказаў
кардынал Маркс. Іерарх падкрэсліў, што “разам з апрацоўкай планаў адносна прадухілення
сексуальнага выкарыстання дзяцей і клопату пра ахвяраў гэтых злачынстваў, неабходна
стварыць новую культуру кантролю. Касцёл павінен стаць месцам адсутнасці гвалту, месцам
любові, месцам бяспечным, асабліва для дзяцей і людзей слабых”.