Апостальская Сталіца асудзіла нелегальнае біскупскае пасвячэнне ў Кітаі
16 ліпеня Зала Друку
апублікавала паведамленне, якое выражае пазіцыю Апостальскай Сталіцы ў справе нелегальнага
біскупскага пасвячэння кс. Джузэппэ Хуанг Бінгчанга, якое адбылося 14 ліпеня у кітайскай
дыяцэзіі Шантоў.
У заяве адзначаецца, што кс. Джусэппэ Хуанг Бінгчанг атрымаў
біскупскае пасвячанне без згоды папы Бэнэдыкта ХVI і па гэтай прычыне яно з’яўляецца
нелегальным. Акрамя таго, згаданы святар падлягае кананічным санкцыям, прадукледжаным
канонам 1382 Кодэкса кананічнага права. Такім чынам, Святы Пасад не прызнае кс. Бінгчанга
ў якасці біскупа дыяцэзіі Шантоў і ён не мае права кіраваць ёй, - сцвярджаецца ў заяве.
Згаданы святар быў заўчасна паінфармаваны аб тым, што яго біскупскае пасвячэнне не
будзе прызнана Апостальскай Сталіцай.
З розных інфармацыйных крыніц Святому
Пасаду было вядома аб тым, што некаторыя біскупы выказалі сваё жаданне не прымаць
удзелу ў гэтым нелегальным пасвячэнні, выказваючы такім чынам свой пратэст. Нягледзячы
на гэта, яны былі прымушаны прыняць удзел у абрадах. “Іх пратэст выклікае ўдзячнасць
усяго Касцёла. Такая ж удзячнасць кіруецца таксама да святароў, кансэкраваных асоб
і свецкіх вернікаў, якія абаранялі сваіх пастыраў, дапамагаючы ім у гэты цяжкі перыяд
малітвай і падзяляючы з імі душэўны смутак”, - сцвярджаецца ў паведамленні Апостальскай
Сталіцы.
Апостальская Сталіца пацвярджае права католікаў Кітая да свабоднага
вызнавання веры, кіруючыся сваім сумленнем і застаючыся вернымі Наступніку св. Пятра,
у адзінстве з Паўсюдным Касцёлам.
“Святы Айцец Бэнэдыкт ХVI, даведаўшыся аб
згаданых падзеях, чарговы раз быў засмучаны тым, як ставяцца да Каталіцкага Касцёла
ў Кітаі і выказаў спадзяванне, што цяперашнія цяжкасці хутка будуць пераадолены”,
- гаворыцца ў паведамленні Святога Пасаду.