Një ekspozitë kushtuar jetës së përtejme, mister i fundmë.
“Jeta e përtejme. Misteri i fundmë”: i kushtohet një teme, asaj të jetës përtej vdekjes,
që e ka shqetësuar gjithnjë njeriun, ekspozita e hapur në Ilegjio, qytezë e vogël
malore, në provincën italiane të Udines. Mund të admirohen rreth 60 vepra, ndërmjet
të cilave, edhe shumë kryevepra: piktura në dërrasë, në pëlhurë, skulptura, elterë
e vepra të artizanatit artistik, papire egjiptiane, gurë varresh parakristiane e vazo
etruske, për të përshkuar një udhë të gjatë, nga mijëvjeçari i parë para Krishtit,
deri në shekullin XX, hap për hap me të vdekurit, të cilët u nisën për botën tjetër
me të njëjtën frikë e me të njëjtat shpresa, deri në shpresën e madhe, që solli Ungjilli,
deri në lajmin më të madh, që kishte shpresuar ndonjë herë njerëzimi: atë të Ngjalljes
së Krishtit e ringjalljes së njeriut. Biseduam me don Alesio Gereti-n, drejtor
i ekspozitës, organizuar nga Komiteti i Shën Florianit:
Përgjigje: -
Tema kryesore të tërheq fort: jemi para një misteri, për të cilin mendja e njeriut
s’ka pushuar së menduari e zemra së rrahuri, në rrjedhë shekujsh. Që kur nisi jetën
njeriu i parë mbi tokë. Sepse, pas jetës, erdhi edhe vdekja, e me të, edhe varrosja.
E varret nisën të stolisen me zbukurime, me fjalë, me simbole, që na zbulojnë mendimin
e shpresën e njeriut të lashtë, se i vdekuri, që zhduket përgjithmonë nën dhe, nuk
është thjeshtë lëndë. Lëndë që kalbet, bëhet hi e pluhur, pa lënë asnjë gjurmë. Duhet
të jetë edhe diçka më shumë. Ekspozita e Ilegjios, përmes disa kapitujve, na kujton
se të gjitha kulturat kanë pasur hamendje shumë të përafërta për atë që ndodh me njeriun
pas vdekjes. Pa mohuar edhe ndryshimet e mëdha. Krishterimi, me fjalën e tij të qartë
e përfundimtare, ngjalljen e Krishtit e dëftimin e tij, i jep fund dallgës së pafundme
të pasigurisë, që e tronditi zemrën e njerëzve, të qytetërimeve, të popujve, në shekuj.
E kjo, sepse nuk e kishin aspak të qartë ç’i priste, pas zbritjes në varr. Pikërisht
këtë pasiguri e davarit drita e Krishtit të Ngjallur. Prandaj edhe ekspozita nis me
ngjalljen e Krishtit e pastaj zhvillohet me vështrim retrospektiv, duke u kthyer prapa
në kohë, për të kujtuar si e përfytyronin jetën e përtejme qytetërimet parakristiane.
Pyetje:
- Ekspozita ka disa seksione, ndërmjet të cilave, edhe atë të artit bashkëkohor.
Mund të na thoni diçka për këtë?
Përgjigje: - Ka pak dëshmi,
por shumë domethënëse, që tregojnë se edhe në nëntëqindtën, kohë në të cilën filozofët
kumtuan ‘vdekjen e Zotit’ e divorcin nga krishterimi, problemi i vdekjes mbeti i ngulur
në mendjen e zemrën e njerëzve, ashtu si edhe kërkimi i rrugës për të dalë nga atmosfera
e saj e errët, pa ardhmëri, me të cilën njeriu nuk do e nuk mund të pajtohet kurrë.
Sepse është krijuar për amshim. Kemi në ekspozitë dy vizatime të mrekullueshme të
Alfred Kubin, njëri nga mjeshtrat më të mëdhenj të pikturës së nëntëqindtës. Janë
dy komente, realizuar menjëherë pas konfliktit të parë e të dytë botëror. I kujtojnë
njerëzimit se vdekja u bie mbi kokë të gjithëve, nuk kursen asnjeri, sado i kënaqur,
i pasur a i mbrojtur më të gjallë. Jeta e vdekja nuk mbrohen me shpata, e as me pushkë.
Vjen dita, kur edhe më të çkujdesurit, do të japin llogari për çkujdesjen e tyre,
ashtu si do të shpërblehen ata, që u kujdesën të dalin të pastruar para Gjyqit të
Mbramë. Në këto dy vepra, vdjekja paraqitet e lodhur e e këputur nga luftërat, në
fushat e të cilave korri e griu me kosën e vet, miliona njerëz. Pa pushuar asnjë çast.
Një shekull të tërë! E ashtu e lodhur, kapet, për të shpëtuar, pas një shkëmbi, që
bëhet pastaj, guri i varrit të saj e, duke soditur sfondin e një deti të skuqur nga
gjaku e nga lotët, të lind vetvetiu mendimi: tani vdekja do të na përlajë të gjithëve!
A nuk do të ishte më mirë të mos bashkëpunonim, në punën e saj të ndyrë? Është një
pyetje, që i kërkon përgjigje vizitorit të ekspozitës e që jehon rishtas në pikturën
e famshme të Xhino Severinit- një nga mjeshtrat e futurizmit italian, titulluar “Vallja
makabre”, një kuadër gati-gati arlekinesk, sepse i realizuar me rombe shumëngjyrëshe,
në lëvizje, që krijojnë atmosferë jete, gëzimi. Por në kundërdritë, dallohet mirë
skeleti i mortjes, edhe ajo gjithnjë në lëvizje, kurrë pa punë. Të duket sikur thotë:
po kënaqeni? Kënaquni, kënaquni! Qeshni e gëzojuni! Por problemi nuk është zgjidhur.
Problemi do të zgjidhet vetëm kur të bini nën tehin e kosës sime. Kur të delni para
gjyqit universal. Mos besoni se nuk ekziston! Disa artistë të tjerë të
nëntëqindtës, që mund të soditen në ekspozitë, kthehen tek motivet ungjillore, siç
është rasti i Pjetër Anigonit, që pikturon ringjalljen e Lazrit, në një çast kur zija
e vdekjes gërshetohet me gazin e jetës. Ndërsa piktori italian Françesko Mesina paraqitet
në ekspozitë me një Zojë të Dhimbshme, që të prek thellë. Prej pëlhurës, Zoja u kujton
të gjitha nënave, që humbasin fëmijët: “E di mirë ç’do të thotë të të vdesë biri”.
Pyetje:
- Janë ekspozuar rreth 60 vepra. Prej nga vijnë?
Përgjigje: -
Shumica vijnë nga anë të ndryshme të Italisë, ose nga Muzetë e Vatikanit, por edhe
nga galeri të mirënjohura arti, si Galeria Ufici e Galeria e Akademisë së Venedikut.
Të tjera, vijnë nga jashtë. Nga Madridi ose nga Muzeu i Vroclavit, në Poloni, nga
Luvri, në Francë….
Pyetje: - Kjo është eskspozita e parë e kësaj
natyre, që hapet në Ilegjio, vend i vogël malor, ku tani banojnë engjëjt, shenjtorët,
por edhe vdekja me kosën legjendare mbi sup, gjithnjë në kërkim viktimash të reja,
në sa në botë fushat e betejave, të vogla e të mëdha, nuk e lënë kurrë të uritur…
Përgjigje:
- Para së gjithash, në këtë vend të vogël malor, me 350 banorë, vijnë çdo
vit më se 35 mijë vizitorë, të pasionuar pas malit, e kjo të kujton se nuk janë vetëm
metropolet qendra, ku mund të kënaqesh me artin. E pastaj, duhet thënë se njeriu i
sotëm, vazhdimisht në shtegtim, ka nevojë, shumë nevojë, përmes ndikimit të fuqishëm
të artit, të mendojë edhe për shtegtimin e mbramë, atë pa biletë, pa asnjë shpenzim
të dukshëm, që e çon në një vend, ku nuk mund të shkojë i gjallë, të cilin, megjithatë,
mund ta njohë para se ta nisë, përmes Shkrimit Shenjt, por edhe përmes veprave të
artit. Që të mos niset i papërgatitur...