Бразілія: біскупы пазнаёмяцца з логікай сучасных СМІ
У Рыа дэ Жанейра пачаўся
семінар для бразільскіх біскупаў, падчас якога іерархі пазнаёмяцца з феноменам камунікацыі,
яе эвалюцыяй і прыродай. У форуме прымае ўдзел старшыня Папскай рады па сродках масавай
камунікацыі, арцыбіскуп Клаўдыё Марыя Чэллі. Ён патлумачыў, што ідэя правядзення семінара
ўзнікла падчас візіту “ad limina” бразільскага епіскапату ў Рым.
Па словах
іерарха, “Каталіцкі Касцёл у Бразіліі хоча запытацца праз сваіх пастыраў, што значыць
сёння камунікаваць. Гэта не азначае толькі інфармаваць, але перш за ўсё прапаведваць.
Прапаведванне Касцёла павінна адбывацца з усведамленнем таго, у чым чалавек мае патрэбу,
чаго шукае. Па гэтай прычыне Касцёл павінен задаць сабе пытанне не толькі пра змест
свайго прапаведвання, але і таксама падумаць як прапаведваць. І тут узнікае справа
мовы, якую мы сёння ўжываем”. На думку арцыбіскупа Чэллі, мова прапаведвання павінна
быць зразумелай сённяшняму чалавеку. Трэба разумець цярпенні чалавека, яго самотнасць.
Чалавек сёння патрабуе цяпла і спакою, а жыве ў мітусні і холадзе.
“Гэта вялікі
выклік для Касцёла, які павінен прапаведваць у глыбокім разуменні таго, што чалавек
носіць у сваім сэрцы і бачыць, як можна адказаць на гэтыя вялікія патрэбы”, - адзначыў
іерарх. - “Касцёл праз пасрэдніцтва СМІ, якія мае ў сваім распараджэнні, павінен шукаць
чалавека. Бо, ў грамадстве, у якім існуюць толькі мітусня і крык, чалавеку цяжка зразумець
слова, якое прапаведуе Касцёл. І праблема штодзённасці – навучаць у спакоі, каб магчы
лепш слухаць. Адукацыя ў спакоі, каб лепш зразумець сябе, таму, што чалавек у сваім
жыцці намагаецца адшукаць сябе самога”, - нагадаў кіраўнік ватыканскай дэкастэрыі.
На
яго думку, калі чалавек не шукае ўнутранага жыцця, яго існаванне становіцца непаўнацэнным.
Касцёл павінен дапамагчы чалавеку ў гэтым пошуку, бо ён з’яўляецца экспертам у чалавечнасці,
і падтрымаць яго, бо свет часта кажа, што шукаць не трэба, амаль поўнасцю нішчачы
гэта ўнутранае шуканне чалавека.