Լիպիոյ ղեկավար Մոամմար Քատտաֆիի որդին` Սէյֆուլ Իսլամ Քատտաֆի ալճերիական «Խապար» օրաթերթին
հետ ունեցած հարցազրոյցի մը ընթացքին յայտարարած է, որ իր հօր վարչակազմը բանակցութիւններ
կը վարէ Ֆրանսայի վարչակազմին հետ: «Մենք Ֆրանսայի հետ կը բանակցինք եւ ոչ թէ ըմբոստներուն
հետ»(ըսած է ան) աւելցնելով, որ լիպիացի պատուիրակը հանդիպում ունեցած է Ֆրանսայի նախագահ
Նիքոլա Սարքոզիի հետ, եւ վերջինս հաստատած է, որ Լիպիոյ Ազգային փոխանցման խորհուրդը,
այսինքն` ըմբոստները «չեն կրնար գոյութիւն ունենալ առանց ֆրանսական զէնքին, դրամներուն
եւ այլ օժանդակութեան»: Ըստ Սէյֆուլ Իսլամ Քատտաֆիի, ֆրանսական կողմը յայտարարած
է, որ Քատտաֆիի հետ համաձայնելէ ետք Ֆրանսա Լիպիոյ Ազգային փոխանցման խորհուրդին պիտի
ստիպէ զինադուլ հաստատել: Իր կողմէ Ֆրանսա յայտարարեց, որ Քատտաֆիին պատգամներ կը
փոխանցուին, սակայն անոր հետ բանակցութիւններ գոյութիւն չունին: