Նախագահ Սարգսեան Ընդունեց Սփիւռքահայ 250 Բժիշկներու Մէկ Պատուիրակութիւնը ։
Յուլիս 7-ին Երեւանի պետական բժշկական համալսարանին մէջ բացումը կատարուեցաւ Բժիշկներու
Երրորդ Միջազգային Համագումարին:
Հայաստանի նախագահ Սերժ Սարգսեան 8 յուլիսին
ընդունեց Հայ բժիշկներու Համաշխարհային Կոմիտէի անդամները, որոնք Հայաստան գացած էին
մասնակցելու՝ Բժշկական Միջազգային 3-րդ Համագումարին ։
Նախագահը ողջունեց եւ
կարեւոր նկատեց համագումարի կայացումը, որուն նպատակը աշխարհասփիւռ հայ բժիշկներու կապը
եւ համագործակցութիւնը զարգացնելով` առողջապահութեան ժամանակակից փորձի փոխանակումը եւ
գիտական նուաճումներու ծանօթանալը, գործնական բժշկութեան եւ բժշկական կրթութեան կարեւորագոյն
հարցերու քննարկումն է: Այդ ամէնը կը ծառայէ Հայաստանի եւ Արցախի մէջ առողջապահութեան
մարզի զարգացման եւ բժշկական օգնութեան որակական բարելաւման: Համագումարի նախագահ
Դերենիկ Դումանեանը, յայտարարեց որ միջազգային այս համագումարին իրենց մասնակցութիւնը
բերած էին աւելի քան 600 բժիշկներ Հայաստանէն, Արցախէն, ինչպէս նաեւ աշխարհի այլ երկիրներէն,
իսկ հայկական սփիւռքէն 250 ներկայացուցիչներ: Նշենք որ Յուլիս 7-9 կայացած սոյն
համագումարին ծիրէն ներս ներկայացուեցան 179 գիտական զեկոյցներ, որոնք կը ներառէին իրենց
մէջ առողջապահութեան աւելի քան 20 ոլորտներ:
Իր հերթին Armenian International
Medical Committee նախագահ, տոքթոր Աւետիս Պօղոսեանը նշեց, որ համագումարի գլխաւոր նպատակը
Հայաստանի, Արցախի եւ Սփիւռքի բժիշկներու միջեւ աշխուժ համագործակցութիւնն է : Միաժամանակ
Պօղոսեան նշեց, որ առողջապահութեան ոլորտը ինչպէս Հայաստանի մէջ, այնպէս ալ Արցախի
մէջ բաւական բարձր մակարդակի կը հասնի: