Малайзія: 50 тыс. дэманстрантаў за свабодныя выбары
У Малайзіі ў мінулыя
выходныя тысячы людзей выйшлі на вуліцы, каб выказацца за свабодныя і справядлівыя
выбары. Каля 1600 пратэстуючых пасля маршу пратэсту ў сталіцы краіны Куала Лумпуры
ў суботу часова былі ўзяты пад варту паліцыяй. У сутыкненнях з сіламі бяспекі ўдзельнічаў
таксама былы віцэ-прэм'ер Анвар Ібрагім, які ў выніку атрымаў траўмы. Іншыя вядомыя
апазіцыйныя палітыкі былі вымушаны правесці ноч у бальніцы з-за ўжытага паліцыяй слёзацечнага
газу.
Арганізатары акцыі – рух “Bersih”, заявілі пра вялікі поспех. Заснаваны
ў 2006 г. рух падтрымліваецца з боку апазіцыйных партый Малайзіі і пазаўрадавых арганізацый.
Яго дзейнасць накіравана на барацьбу з карупцыяй і правядзенне празрыстых выбараў.
Урад
прэм'ер-міністра Наджыба Разака назваў рух “Bersih” “здраднікамі рэлігіі, народу і
краіны”. Сам кіраўнік урада зноў абвінаваціў блізкаўсходніх хрысціян, камуністаў і
замежных грамадзян у “натхненні” да пратэстаў. Каталіцкі Касцёл Паўднёва-Усходняй
Азіі заклікаў да малітвы за мірны канец дэманстрацый.
Трэба адзначыць, што
на панядзелак, 18 ліпеня, у Кастэль Гандольфа запланавана сустрэча прэм'ер-міністра
Наджыба Разака з папам Бэнэдыктам XVI.
На думку назіральнікаў, этнічная і рэлігійная
напружанасць у краіне існуе ўжо на працягу апошніх некалькіх гадоў. Каля 60%, прыблізна
27 млн., малайзійцаў вызнаюць іслам, 19% – будызм, і 9% – хрысціянства.