Papa filloi pushimet verore në Kastel Gandolfo. Veprimtaritë e ardhshme.
Benedikti XVI e kremtoi sot lutjen e Engjëllit të Tënzot në Kastel Gandolfo, ku arriti
të enjten pasdite, pas një udhëtimi të shkurtër me helikopter nga Vatikani, për në
selinë e tij verore. Këtu do të kalojë një periudhë pushimi. Sapo arriti në selinë
papnore, u duk në ballkonin mbi Sheshin e Kastel Gandolfos, për të përshëndetur besimtarët
që, sipas traditës, ishin mbledhur për t’i uruar mirëseardhjen, duke u dhënë edhe
bekimin. Kujtojmë se gjatë pushimeve të Papës, ndërpriten të gjitha audiencat private
e të veçanta; edhe audienca e përgjithshme e së mërkurës, që do të rifillojë më 3
gusht. Papa do të vijojë ta kremtojë lutjen e Engjëllit të Tënzot nga Selia verore
e Kastel Gandolfos. Një ndërprerje tjetër, do të jetë ajo e gushtit, kur Benedikti
XVI do të niset në Madrid, për kremtimin e Ditës Botërore të Rinisë.