Me fotografi dhe imazhe të të rinjve me dukje jokarakteristike për shqiptarët dhe
evropianët, mediat amerikane të shkruara dhe elektronike raportuan për myslimanët
që përmes protestës dhe faljes masive kërkojnë xhami në qendër të kryeqytetit të Kosovës,
njofton korrespondenti i RTK nga Nju Jorku, Sulejman Gashi. Në raporte thuhej
se kërkesat për xhaminë në qendër janë rritur që prej ndërtimit të Katedrales katolike
në hyrje të sheshit kryesor të qytetit, një kërkesë kjo e inicuar nga vetë kryemyftiu
në përurimin ceremonial të katedrales. Dukjet e të rinjve shqiptarë aludojnë pashmangshëm
në fytyra e imazhe jo shumë miqësore për Amerikën si shtet dhe amerikanët si popull.
Janë shpeshherë imazhet dhe dukjet e tilla që krijojnë frikë tek amerikanët nëse i
shohin ata të hyjnë në aeroplan, apo në metro apo kudo, si personifikim i një kërcënimi
që gjithëherë do të kujtojë 11 shtatorin famëkeq të vitit 2001. Pamjet e tilla nga
Kosova mike dhe aleate, e proklamuar gjithandej me përqindjen më të lart të favorshme
pro Amerikës si shtet, vënë në pikëpyetje këtë përkushtim. Një islam politik i
importuar nga sekte dhe financime të dyshimta prej vitesh në Kosovë, tani me masën
dhe guximin i dalë ashiqare përballë dhe si pandan para shtëpisë së demokracisë, krijon
frikën e një nisme dhe hyrje të fetarizmit në politikën dhe jetën sociale të Kosovës,
që përjashto këtë kabinetin e fundit qeveritar, kishte ruajtur sekularizmin aq shumë
të proklamuar dhe të nevojshëm për shqiptarët. Imazhet e tilla mjekrrash të pakultivuara
dhe pantollonash cub i japin tablo filmike me bollëk të gjithë atyre që prej vitesh
shpallin si kërcënim në rritje fundamentalizmin islamik në Kosovë, e që tash e tutje
do ta shoqërojnë edhe me filmime origjinale nga kryeqyteti. (nga QIK-u)