ՀՄԸՄ-ի ֆութպոլի յանձնախումբին նախաձեռնութեամբ եւ մարզիկներու դաստիարակչական ծրագիրի
իրագործման ծիրին մէջ, ՀՄԸՄ-ի ժիւնիորներու միջակ տարիքի խումբը վերջերս , այցելեց Զմմառու
վանքը` ամբողջ օր մը հիւրը ըլլալով Զմմառու վանքի վանական հայրերուն: Այս առթիւ Վանքի
եկեղեցւոյ մէջ, մարզիկները իրենց մարզիչներու ու պատասխանատուներուն հետ միասին մասնակցեցան
եկեղեցական արարողութեան որուն ընթացքին հայր Բարսեղ վրդ. Պաղտասարեան քարոզեց ու ապա
անոնց փոխանցեց կրօնական պատգամը: Աւարտին մարզիկները շրջեցան Զմմառու վանքը եւ այցելեցին
պատմական թանգարանը, ուր հայր Նարեկ Լուիսեան բացատրութիւններ տուաւ իւրաքանչիւր թանկարժէք
իրի, գծագրութիւններու եւ թանգարանին մէջ գտնուող հնութիւններուն մասին: Թանգարան
այցելութենէն ետք տեղի ունեցաւ ֆութպոլի մրցում մը ժիւնիորներու խումբին եւ Զմմառու վանքի
սաներուն միջեւ, որմէ ետք ալ ֆութպոլի խումբը եւ պատասխանատուները կէսօրին վանքին ճաշի
հիւրը եղան: