Երջանկայիշատակ Գարեգին Ա. Ամենայն Հայոց Կաթողիկոսի Մահուան 12-րդ Տարելիցը։
12 տարի առաջ 1999-ի յունիս 29-ին՝ Ամենայն հայոց Գարեգին Ա. կաթողիկոսը, երկրային իր
բուռն գործունէութենէն յետոյ կը վախճանէր վայելելու վաստակած երկնային հանգիստը։ Լուսահոգի
կաթողիկոսի գահակալութեան շրջանը Ս. Էջմիածնի մէջ կարճ էր բայց հիմնակերտ: Ան մեծապէս
նպաստեց հաւատացեալներուն մէջ քրիստոնէական գիտակցութեան ու ազգային արժէքներու ամրապնդման,
երիտասարդ հոգեւորականներու պատրաստման, վանքերու ու եկեղեցիներու նորոգման ու կառուցման,
հրատարակչական գործունէութեան, աշխարհասփիւռ հայութեան տարաբեւեռ հանգրուաններուն մէջ
հովուական ծառայութեան մատուցման…: Պատմական խառն ժամանակներուն Գարեգին Ա. պատասխանեց
Աստուծոյ կանչին` եւ ընդունեց հովուել իր հօտը իբրեւ Ամենայն հայոց հայրապետ։ Եղաւ համամիութենական
ոգիով Կաթողիկոս մը, համաշխարհային անձ՝ համաշխարհային գիտակցութիւն եւ ներգործութիւն
ունեցող անձ մը, որ խանդավառող ուժ դարձաւ տարբեր եկեղեցիներու հաւատացեալներու համար: