Бэнэдыкт XVI: эгаізм – гэта прычына беднасці і голада
1 ліпеня Бэнэдыкт
XVI прыняў на аўдыенцыі ўдзельнікаў 37-й Канферэнцыі ФАО (міжнароднай арганізацыі
ААН па праблемах харчавання і сельскай гаспадаркі), якая праходзіць у Рыме з 25 чэрвеня
па 2 ліпеня. У сваёй прамове Папа заклікаў да барацьбы з беднасцю і голадам, нагадаў,
што прычынай крызіса сталі не толькі праблемы ў тэхнічнай і эканамічнай сферах, але
і ў маральнай, а таксама звярнуў увагу на неабходнасць адкрыцця каштоўнасці сямейных
сельскіх прадпрыемстваў.
“У часы крызіса, які закрануў амаль усе сферы эканамічнай
і сацыяльнай рэальнасці, яшчэ больш тэрміновай з’яўляецца патрэба барацьбы з беднасцю,
першага кроку, неабходнага, каб вызваліць міліёны людзей, дзяцей і жанчын, ад голада.
- сказаў Пантыфік - Грунтоўнае разважанне прымушае нас шукаць прычыны сённяшняй сітуацыі
не абмяжоўваючыся толькі аналізам ўзроўняў вытворчасці, павелічэннем патрэбы ў прадуктах
харчавання ці зменлівасцю коштаў: гэты фактары безумоўна важныя, але яны ствараюць
рызыку разумення драмы голада толькі ў тэхнічным ключы”. Святы Айцец адзначыў, што
беднасць, недаразвіццё і голад з’яўляюцца вынікам эгаізму, які, выходзячы з чалавечага
сэрца, праявіўся ў сацыяльнай сферы, эканамічным абмене, стане рынку, недахопе ежы
і пераўтварыўся ў адчужэнне першаснага права кожнага чалавека харчавацца і быць свабодным
ад голада. “Як мы можам быць спакойнымі перад фактам, што ежа стала аб’ектам спекуляцый,
а фінансавы рынак, пазбаўлены дакладных правілаў і маральных прынцыпаў, мае адзіную
мэту – прыбытак?”, - запытаў Бэнэдыкт XVI.
Папа звярнуў увагу існуючую ў свеце
патрэбу ў салідарнасці паміж краінамі для вырашэння гэтых праблем. “Неабходна, каб
салідарнасць стала першасным крытэрыем кожнага палітычнага акту і стратэгіі, і, такім
чынам, міжнародная супольнасць пачала б служыць усёй чалавечай сям’і, асабліва самым
бедным”, - сказаў Святы Айцец.
Бэнэдыкт XVI заклікаў нанава адкрыць каштоўнасць
сельскіх сямейных прадпрыемстваў і падтрымліваць іх, каб дасягнуць стабільнай харчовай
бяспекі. “Сапраўды, у сельскім свеце, традыцыйная сям’я мае заданне спрыяць вытворчасці
прадуктаў харчавання праз мудрую перадачу ад бацькоў да дзяцей не толькі сістэмаў
вырошчвання, захавання і продажу прадуктаў, але таксама і спосабаў жыцця, адукацыйных
прынцыпаў, культуры, рэлігійнасці, разумення сакральнасці асобы на ўсіх этапах яе
жыцця”, - звярнуў увагу удзельнікаў 37-й Канферэнцыі ФАО Святы Айцец.