Liturgjia e Fjalës së Zotit e dielës së 14-të gjatë vitit kishtar ‘A’
Ja përsëri në takimin tonë javor të së shtunës me Fjalën e Zotit të liturgjisë hyjnore
të së dielës, kësaj here do të dëgjojmë e meditojmë së bashku leximet biblike të liturgjisë
së Fjalës Hyjnore të dielës së 14-të gjatë vitit kishtar, ciklit të parë, sipas kalendarit
liturgjik të Kishës. Në leximet biblike të kësaj së diele të 14-të gjatë vitit
kishtar, kthehet tema e dashurisë së Zotit për të fundmët, për ata njerëz që janë
të varfër e të mënjanuar. Liturgjia e Fjalës së Zotit e kësaj diele pohon se Dëftimi
i Zotit nuk është manifestim i pushtetit por i afërsisë, besëlidhjes dhe i solidaritetit
me njeriun, e në mënyrë të veçantë me njeriun që është i fundit. Edhe paradoksi i
krishterimit është pikërisht ky: shpëtimi i Zotit kalon përmes njerëzve që janë të
fundmët, të varfër, të vegjël të cilëve u është zbuluar misteri i mbretërisë së Zotit,
mister që u fsheh para atyre që konsiderohen të dijshëm e të pushtetshëm. Mu për
këtë arsye lutja e dytë e meshës së kësaj së diele i kërkon Zotit përvujtërinë: “
O Zot, që i dëftohesh të vegjëlve…na bënë të varfër, të lirë e ngazëllues, sipas shembullit
të Krishtit Birit tënd…që është zemër butë e i përvujtë” Leximi i parë i kësaj
së diele kumton solemnisht dëftimin e Mesisë në Jerusalem dhe dhuratën e paqes që
Ai i sjell botës mbarë. Këtij dëftimi Mesianik i shtohen theksime e nënvizime të reja,
që evokojnë profecinë e paqes në Izainë profet e figurën e shërbëtorit të vuajtur:
Mesia do të jetë i butë e i varfër e do të vihet në krye të një populli të varfërish. Liria
që jemi fituar në Krishtin, thotë leximi i dytë, është vepër e Shpirtit: Shpirti na
bënë pjesëmarrës të jetës së Jezu Krishtit. Mirëpo, kësaj dhurate duhet t’i përgjigjet
zgjedhja e përcaktimi jonë i përditshëm për të jetuar në përkim me hirin e Zotit,
duke jetuar jo të dhënë pas epsheve të trupit por pas Shpirtit. Vetëm duke bërë të
vdesin ‘veprat e trupit’ mund të jetojmë jetën e re që kemi marrë dhuratë prej Krishtit
Zot. Ungjilli i kësaj së diele përsërit fjalët e Jezusit që na thotë: “..ejani
tek unë të gjithë ju që jeni të lodhur prej barrës së rëndë e unë do t’ju çlodhi”.
Jezusi na paraqitet zemër butë e i përvujtë, nuk imponon ndonjë barrë që rëndon e
shtyp, por vendoset përkrah nesh në udhën tonë për të na ndihmuar në orientimin e
cakut e për të na udhëhequr tek Ati Qiellor. Liturgjia e kësaj së diele të 14-të
gjatë vitit kishtar, kundron një aspekt të fytyrës së Jezusit, që Mateu e ka përzemër:
butësinë (shpirtbutësinë) e tij. Qysh në kohën e vet, Zakaria profet (I lexim)e pat
paraqitur Mesinë e pritur si të përvujtë e të butë, mbi një gomar e jo mbi kali, kafshë
lufte. Vërtetë Ai vjen për të kumtuar paqen. Vetëm Mateu, duke cituar tekstin profetik
të hyrjes së Jezusit në Jerusalem, saktëson se po vjen si mbret i butë (21,5). E në
pjesën e Ungjillit që dëgjojmë në liturgjinë hyjnore të kësaj së diele, është vet
Jezusi që dëftohet (shfaqet) si i zemër butë dhe i përvujtë, plot përdëllim: nuk vjen
për të imponuar asnjë barrë të rëndë mbi krahët tanë, por për ndarë bashkë me ne peshët
tona që na rëndojnë, duke i marrë mbi vete. Marrëdhënia që Jezusi jeton me ne varën
nga mënyra e tij e të qëndruarit para Atit Qiellor. Vet Ai radhitet ndër ata të vegjël
të cilëve Hyji u dëfton misteret e veta. Meqë merr gjithçka, edhe mund të thotë: ejani
tek unë, ju të gjithë. Ne jemi dhuratë që ai e pranon prej duarve të Atit, për ta
ruajtur me butësinë e me përvujtërinë e të varfrit. Me Palin apostull (II lexim) le
të kërkojmë që Shpirti i Krishtit të banojë në ne, e të na mësojë e ndihmojë ti përjetojmë
të njëjtat ndjenja të tij, ndërmjet nesh e para Hyjit. Zakaria profet njofton
e kumton ngjarjen e Mesisë-mbret, i dërguari i Hyjit: ai vjen në përvujtëri e në butësi,
duke shaluar mbi gomar. Shpirti Shenjt Zot që zbriti në ne në pagëzim është zanafilla
(parimi – burimi) jetike e ekzistencës së të krishterë, që udhëhiqet nga Shpirti e
nuk qeveriset (drejtohet) vetëm nga arsyet (mendja) njerëzore e aspiratat vetëm tokësore. Jezusi
e bekon Atin qiellor pse ka rezervuar për të “vegjlit” njohjen e sekreteve të hirit
hyjnor e gëzimin e Ungjillit dhe ua ka mohuar të diturve e të urtëve, që janë të mbyllur
në krenarinë e mendjemadhësinë e tyre. Më shumë mbi programin kushtuar Liturgjisë
së Fjalës Hyjnore të dielës së 14-të gjatë vitit, mund të dëgjoni këtu.....