Papa kryeipeshkvijve të rinj metropolitë: mos vini asgjë mbi Krishtin e forconi lidhjen
e posaçme me Pasardhësin e Pjetrit.
Takim familjar, me frymë të thellë bashkimi kishtar. Benedikti XVI priti, sot paradite,
në audiencë, në Sallën e Palit VI, kryeipeshkvijtë metropolitë, që morën dje Palion
e Shenjtë, së bashku me familjarët e besimtarët e tyre. Duke u folur prelatëve në
shumë gjuhë, sepse përfaqësues të shumë kombeve, Papa u ndalua në mënyrë të posaçme
tek hallka e pakëputshme, që i lidh kryeipeshkvijtë e rinj me Pasardhësin e Shën Pjetrit.
“Mos
vini absolutisht asgjë mbi Krishtitn, sepse edhe Ai nuk vë asgjë mbi ne”: citoi
veprën e Shën Çiprianit Benedikti XVI, për t’u treguar kryeipeshkvijve të rinj metropolitë
cili është ylli polar për jetën e misionin e tyre. Ati i Shenjtë nënvizoi edhe atmosferën
e bashkimit kishtar, që ndjehej fort në audiencën, me pamjen e një takimi të thjeshtë
e familjar. Pastaj u dha kryeipeshkvijve të rinj një bekim të posaçëm: “Zoti
ju bekoftë gjithmonë e ju ndihmoftë në misionin tuaj të përditshëm ipeshkvnor, në
mënyrë që grigja, e cila ju është besuar, të rritet e bashkuar e misionare, e njëzëshme
në bamirësi, e patundur në shpresë dhe e pasur me gjallërinë e fesë”. Duke,
folur, më pas, në gjuhën franceze, Papa kujtoi kryesisht vlerën e Palios, që u vuri
kryeipeshkvijve të rinj mbi shpatulla në Solemnitetin e Shën Pjetrit e të Shën Palit: “Vous
qui avez reçu le pallium… Juve, që morët palion, simbol liturgjik, i cili
shpreh në mënyrë të veçantë hallkën e bashkimit me Pasardhësin e Shën Pjetrit – tha
Papa – ju uroj të jeni dëshmitarë gazmorë e besnikë të dashurisë së Zotit, që kërkon
t’i bashkojë të gjithë bijtë e vet në një familje të vetme”. Mbi vlerën e Palios,
Papa foli edhe kur iu drejtua kryeiepshkvijve në gjuhën angleze: “The pallium
is received from the hands… Palio – vërejti – merret nga duart e Pasardhësit
të Shën Pjetrit e mbahet mbi supe nga kryeipeshkvijtë, si shenjë e bashkimit në fe
e në dashuri, për t’i prirë kështu, Popullit të Zotit. Palio, vijoi Ati i Shenjtë
– u kujton kryeipeshkvijve përgjegjësinë krysore: të jenë barinj sipas zemrës së Krishtit. E
lidhjen me Selinë Apostolike Benedikti XVI e theksoi edhe gjatë përshëndetjeve në
gjuhën spanjolle. Ati i Shenjtë e përfundoi bisedën me sivëllezërit, duke folur në
gjuhën italiane. Falënderoi Zotin që, me mirësinë e tij të pambaruar, vijon t’i dhurojë
barinj Kishës dhe i siguroi të gjithë për afërsinë e tij:“Ju, të dashur
kryiepshkvij metropolitë, ju siguroj për afërsinë time shpirtërore e për lutjen time
drejtuar Zotit, që t’ju ndihmojë në shërbimin tuaj baritor, që ka si kërkesë kryesore,
dashurinë për Krishtin. Mbi Të nuk duhet të vini absolutisht asgjë”.