Në Lutjen e Engjëllit të Tënzot, Ati i Shenjtë përshëndet dioqezën e tij, Romën.
Pas Meshës solemne të festës së Shenjtorëve Pjetër e Pal, Papa kremtoi lutjen e Engjëllit
të Tënzot, duke iu drejtuar dioqezës së tij, me fjalët: “O Romë e lumtur!
këndohet sot, në solemnitetin e Shenjtorëve Pjetër e Pal, pajtorë të këtij qyteti”. E
lumtur, pse pati fatin të bëhej qytet, ku dhanë dëshminë e gjakut për Krishtin, dy
apostujt më të dashur të Zotit, njëri prej të cilëve, Papa i parë, Pjetri, i kryqëzuar
si Mjeshtri. E vendi ku u ngul kryqi, në të cilin Pjetri u kryqëzua me kokë tatëpjetë,
sepse iu duk vetja e i padenjë të kryqëzohej si Zoti, u bë seli e papëve, zemër e
katolicizmit botëror! Pastaj, falënderimi i Benediktit XVI në këtë ditë të posaçme
për Të e për mbarë Kishën:“I shpreh mirënjohjen Zotit për thirrjen e për shërbimin,
që më besoi; e, falënderoj edhe të gjithë ata që, me këtë rast, më shprehën afërsinë
e tyre e që e mbështesin misionin tim me lutjen, e cila i lartohet Zotit vazhdimisht
nga çdo bashkësi kishtare, në adhurim para Krishtit Eukaristi, për t’i kërkuar forcë
e zell të ri në kumtimin e Ungjillit”.