Бэнэдыкт XVI прыняў членаў дэлегацыі Канстантынопальскага Патрыярхата
28 чэрвеня Бэнэдыкт
XVI сустрэўся з членамі дэлегацыі Канстантынопальскага Патрыярхата, якія прыбылі ў
Рым з нагоды ўрачыстасці св. апосталаў Пятра і Паўла. У сваёй прамове да пасланнікаў
Патрыярха Барталамея І, Святы Айцец адзначыў, што іх прысутнасць у Рыме, як і прысутнасць
пасланнікаў Папы ў Канстантынопалі на ўрачыстасці ў гонар св. апостала Андрэя, сведчыць
аб сяброўстве і сапраўдным братэрстве, якія аб’ядноўваюць Рымскі Касцёл і Экуменічны
Патрыярхат. “Гэта сувязь мае моцны фундамент у веры, якую мы атрымалі праз апосталаў”,
- сказаў Бэнэдыкт XVI. Акрамя таго, Святы Айцец адзначыў, што “сувязь паміж Цэрквамі
павінна мацнець, каб дасягнуць поўнага бачнага адзінства”.
У сваёй прамове
Папа звярнуў увагу на важнасць працы Змешанай камісіі па тэалагічнаму дыялогу паміж
Каталіцкім Касцёлам і Праваслаўнай Царквой. “Мы пакліканы разам і ў любові працягваць
гэты шлях, просячы Святога Духа аб святле і натхненні, з упэўненасцю, што ён жадае
прывесці нас да поўнага спаўнення волі Хрыста: каб усе былі адно”, - сказаў Святы
Айцец.
Пантыфік адзначыў, што ў нашым гістарычным кантэксце, які характарызуецца
распаўсюджваннем гвалту, абыякавасці і эгаізму, супольным сведчаннем Евангелля можна
дапамагчы чалавеку знайсці шлях, які прывядзе яго да праўды. “Пошук праўды, гэта заўсёды
пошук справядлівасці і міру, і я з вялікай радасцю хачу ацаніць той уклад, які робіць
у гэтай сферы Яго Святасць Барталамей”, - падкрэсліў Святы Айцец. Папа запрасіў прысутных
гасцей, а таксама прадстаўнікоў іншых рэлігійных традыцый, дзеячоў культуры і навукі,
прыняць удзел у Дні разважання, дыялогу і малітвы аб міры і справядлівасці ў свеце,
які пройдзе 27 кастрычніка ў Асізі. “Ісці разам па дарогах горада св. Францішка, гэта
сімвал нашага жадання працягваць шлях дыялога і братэрства”, сказаў Бэнэдыкт XVI.