Drejt 60-vjetorit të shugurimit meshtarak të Benediktit XVI. Fjalët e Papës mbi meshtarinë,
dhuratë e Zotit në shërbim të Kishës
Kisha Katolike përgatitet të festojë me nisma të shumta në të gjithë botën, 60-vjetorin
e shugurimit meshtarak të Benediktit XVI, më 29 qershor. Meshtarisë, dhuratë e paçmuar
e Zotit, Papa i ka kushtuar shumë reflektime, që arritën kulmin gjatë 2010-ës, në
Vitin Meshtarak, shpallur me rastin e 150-vjetorit të vdekjes së meshtarit shenjt
Gjon Maria Vianej. “Një ditë e mrekullueshme vere, që mbetet e paharrueshme si
çasti më i rëndësishëm i jetës sime”: me këto fjalë, të thjeshta e të thella, Jozef
Racinger e kujton në autobiografinë e vet, ditën e shugurimit meshtarak, më 29 qershor
1951 në katedralen e Frizingës, në Gjermani. Provania Hyjnore desh që pasardhësi i
265-të i Shën Pjetrit të shugurohej pikërisht në Solemnitetin e shën Pjetrit e të
shën Palit. Shpesh, Ati i Shenjtë ka nënvizuar se meshtari është i thirrur të shpallë
Fjalën e Zotit e jo idetë e veta: “Ta bëjë të pranishme, në konfuzionin e në
çorientimin e kohëve tona, dritën e Fjalës së Zotit, dritën, që është vetë Krishti
për këtë botën tonë. Prandaj, meshtari nuk u mëson njerëzve idetë e veta, apo ndonjë
filozofi, që e ka shpikur vetë, ose e ka gjetur, ose i pëlqen; meshtari nuk flet nga
vetveteja, nuk flet për vete, për të mbledhur rreth vetes admirues, ose për të krijuar
partinë e vet; nuk thotë gjëra të vetat, shpikje të vetat, por, në konfuzionin e të
gjitha filozofive, meshtari predikon në emër të Krishtit të pranishëm, propozon të
vërtetën, që është Krishti vetë, fjala e Tij, mënyra e Tij e jetesës” (Audienca e
përgjithshme, 14 prill 2010). Duke folur para Kongregatës për Klerin, Papa
shpjegon se besimtarët presin që meshtarët të jenë deri në fund të tillë, të kenë
një jetë profetike e pa kompromis: “Kemi shumë nevojë për meshtarë që t’i flasin
botës për Zotin dhe t’ia paraqesin Zotin botës; njerëz, që nuk shkojnë pas modave
kulturore të çastit, por janë të aftë të jetojnë me vërtetësi atë liri, të cilën është
në gjendje ta japë vetëm siguria se i përkasin Zotit” (Audienca me Kongregatën për
Klerin, 12 mars 2010). Gjatë Vitit Meshtarak, Papa i inkurajoi meshtarët të
rizbulojnë bukurinë e shërbimit të tyre dhe u tregoi edhe si ta bëjnë këtë: “Duhet
të rrimë me Jezusin për të ndenjur pastaj me të tjerët. Kjo është zemra e misionit.
Në shoqërinë e Krishtit e të vëllezërve, secili prej meshtarëve mund të gjejë energjitë
e nevojshme për t’u kujdesur për njerëzit, për të zgjidhur problemet shpirtërore e
materiale që ndesh, për të predikuar me fjalë gjithnjë të reja, të diktuara nga dashuria,
të vërtetat e amshuara të fesë, për të cilat kanë etje dhe bashkohësit” (Audienca
me Vëllazërinë e Shën Karlit, 12 shkurt 2011)