Benedikti XVI para R.O.A.C.O.-së: të krishterët e Lindjes së Mesme nuk janë të huaj,
t'u respektohen të drejtat
Të premten e kaluar, Papa Benedikti XVI priti në audiencë në Vatikan, pjesëmarrësit
e asamblesë së Veprave në Ndihmë të Kishave Lindore, R.O.A.C.O. Ati i Shenjtë bëri
thirrje për ndihmë humanitare e ndërmjetësim për paqen në vendet e Afrikës së Veriut,
ku duhet të ndalë sa më shpejt dhuna. Jozef Racinger nënvizoi se këto vende janë shumë
të rëndësishme për paqen dhe qëndrueshmërinë në botë dhe se është e domosdoshme që
aty të respektohen të gjitha të drejtat e njerëzve dhe të bashkësive. Duke u nisur
nga kjo situatë, “burim shqetësimi për të gjithë botën”, Papa shprehu afërsinë e tij
për ata që vuajnë e që përpiqen të largohen me çdo kusht nga dëshpërimi e persekutimi,
duke rritur kështu flukset e emigracionit. Pikërisht emigrantët, tha Benedikti XVI,
nuk duhen lënë pa shpresë e duhen mirëpritur kudo. Papa foli edhe për gjendjen
e të krishterëve në Tokën e Shenjtë e në Lindjen e Mesme e pastaj iu drejtua anëtarëve
të R.O.A.C.O.-s me një thirrje tjetër: “Ju kërkoj të bëni ç’është e mundur – edhe
duke përfshirë autoritetet publike, me të cilat jeni në kontakt në nivelin ndërkombëtar
– që në Lindje, aty ku kanë lindur, barinjtë e besimtarët e Krishtit të mund të jetojnë
jo si të huaj, por si qytetarë, të cilët dëshmojnë Jezu Krishtin, siç kanë bërë para
tyre shenjtorët e së kaluarës, edhe ata bij të këtyre Kishave lindore”.