2011-06-24 11:20:15

Պենետիկտոս ԺԶ. Սրբազան Քահանայապետը Գերապայծառ Ռաֆայէլ Մինասեանը Անուանեց Հայաստանի Վրաստանի Եւ Արեւելեան Եւրոպայի Կաթողիկէ Հայոց Առաջնորդ՝ Շնորհելով Անոր Արքեպիսկոպոսութեան Տիտղոս։


Ուրբաթ 24 յունիս 2011, Պենետիկտոս ԺԶ. Սրբազան Քահանայապետը Զմմառու Միաբան Հ. Ռաֆֆայէլ Վրդ. Մինասեան անուանեց ՝ որպէս նոր Առաջնորդ Հայաստանի Վրաստանի եւ Արեւելեան Եւրոպայի Հայ Կաթողիկէ Թեմին, շնորհելով անոր Արքեպիսկոպոսութեան աստիճան:
Ռատիովատիկանի հայերէն հաղորդումներու անձնակազմը կը շնորհաւորէ նորնտրեալ եպիսկոպոսը մաղթելով անոր օրհնաբեր առաքելութիւն մը։
Հ. Ռաֆայէլ Մինասեան

Ռաֆֆայէլ Մինասեան ծնած է Լիբանան 1946 թուականի Նոյեմբեր 24-ին:
Ծնողքը Պետրոս եւ Ռոզա Մինասեաններ:

1958-ին՝ մուտք կը գործէ Զմմառու Հայ կաթողիկէ Արծիւեան Միաբանութեան կղերանոցը ուր կը ստանայ իր երկրորդական կրթութիւնը:

1966-ին կ'ուղարկուի Հռոմ՝ Լեւոնեան Վարժարան եւ կ'աշակերտի Քահանայապետական Գրիգորեան համալսարանին, ուրկէ կը ստանայ փիլիսոփայութեան եւ Աստուածաբանութեան վկայականները:

Շարունակած է իր ուսումը Հռոմի Սալեզեան համալսարանին մէջ մասնագիտանալով գործնական հոգեբանութեան գիտութեան մէջ:

Քահանայ ձեռնադրուած է 1973 թուականի Յունիս 24-ին, Պէյրութ, Լիբանան:

Մինչեւ 1980 ստանձնած է Պէյրութի Ս. Գրիգոր Լուսաւորիչ / Ս. Եղիա Աթոռանիստ եկեղեցւոյ հովութիւնը:

1978-ին նշանակուեցաւ Քարտուղար Լիբանանի Հայ Կաթողիկէ եկեղեցական ատեանին ապա դատաւոր մինչեւ 1989:

1984-1986՝ Քարտուղար Երջանկայիշատակ Յովհաննէս Պետրոս ԺԸ Կաթողիկոս Պատրիարքին:

1984-1990 Ժողովրդապետ Զալքայի Ս. Խաչ Եկեղեցւոյ Լիբանանի մէջ: Այս շրջանին իր ձեռնարկներուն ամենամեծը եղաւ Զալքայի Սուրբ Խաչ եկեղեցւոյ, դպրոցին եւ սրահին կառուցումը:

1988-1990՝ Sնօրէն Գ. Հարպոյեան Վարժարանին, Զալքա-ի Ս. Խաչ Եկեղեցւոյ կից:

1990-2006 Ժողովրդապետ Ամերիկայի Միացեալ Նահանգներու Գալիֆորնիոյ նահանգին՝ հանդիսանալով առաջին Զմմառեան Միաբանը որ ստանձնեց այս պաշտօնը: Ան հիմնադիր անդամներէն մէկը եղաւ «Armenian Alliance» բարեգործական հիմնադրամին, որուն հովանաւորութեամբ՝ իրականացան մարդասիրական եւ տնաշինման զանազան ծրագիրներ, Հայաստանի աղքատ շրջաններուն մէջ:


Կլէնտէյլի մէջ, Հայր Ռաֆֆայէլ Մինասեան ձեռնարկեց նաեւ Սուրբ Գրիգոր Լուսաւորիչ Հայ Կաթողիկէ Եկեղեցւոյ կառուցման ծրագրին, որ իր աւարտին հասաւ 1998-ի Յունուարին, եւ օծումը տեղի ունեցաւ 2001-ին՝ Հայ Ժողովուրդի քրիստոնէացման 1700 ամեակի առիթով:
26 Սեպտեմբեր 2005-ին՝ Ամեն. եւ Գերերջ. Տ.Տ. Ներսէս Պետրոս ԺԹ. Պատրիարք Կաթողիկոսը զինք անուանեց Պատրիարքական Եկզարք Երուսաղէմի եւ Ամմանի Էկզարքութեան:
2005-ին Իտալիոյ մէջ ան հիմնեց «ԹէլէՓաչէ Արմէնիա» հեռատեսիլի կայանը, որ ամէն օր, հայերէն լեզուով եւ արբանեակային հեռարձակումով կը սփռէ Աւետարանի պատգամը եւ Հայ Եկեղեցւոյ ու զանազան համայնքներուն լուրերը:

2009-ին Երուսաղէմի՝ Մեր Տիրոջ Յիսուս Քրիստոսի Խաչի Ճանապարհի չորրորդ կայանին, որ կը գտնուի Հայ Կաթողիկէ համալիրին մէջ, հաստատեց Սուրբ Հաղորդութեան խորհուրդի մնայուն երկրպագութիւնը, որուն շարունակականութիւնը կ'ապահովեն Ս. Պօղոսի անուան նուիրուած միաբանութեան մայրապետները:









All the contents on this site are copyrighted ©.