Гродна: працэсія Божага Цела па вуліцах горада ў дзень урачыстасці
Сёння Каталіцкі Касцёл
адзначае Урачыстасць Найсвяцейшага Цела і Крыві Хрыста (Божае Цела). Святочная працэсія
пройдзе сёння па вуліцах Гродна. Яна пачнецца ў 18.00 гадзін набажэнствам каля касцёла
Маці Божай Анёльскай.
Раней працэсія заўсёды пераносілася на нядзелю для большай
зручнасці вернікаў, але год таму было вырашана праводзіць яе менавіта ў чацвер, у
дзень самой урачыстасці, каб католікі горада атрымалі магчымасць глыбей адчуць яе
атмасферу і больш свядома паўдзельнічаць у ёй. У прошлым годзе гэта сапраўды ўдалося,
таму было вырашана прытрымлівацца гэтай практыкі ў будучым.
Узначаліць працэсію
Біскуп Гродзенскі Аляксандр Кашкевіч. У ёй прымуць удзел усе святары Гродна, наваколля
і некаторых парафій дыяцэзіі. Духавенства і вернікі пройдуць па цэнтральных вуліцах
горада – Гагарына, Парыжскай камуны, Свярдлова, Карла Маркса, і будуць маліцца падчас
чатырох прыпынкаў – каля Францішсканскага, Бернардынскага, Брыгідскага касцёлаў, а
напрыканцы – у катэдральным касцёле св. Францішка Ксаверыя.
Адметнасцю сёлетняй
працэсіі стане чытанне ўрыўкаў Евангелля на чатырох мовах, на якіх размаўляюць мясцовыя
жыхары: па-беларуску, па-руску, па-літоўску і па-польску. Чакаецца, што ў працэсіі
прымуць удзел каля 5 тыс. чалавек, у тым ліку некалькі соцень дзяцей, якія прынялі
ў гэтыя дні Першую святую Камунію.