Papa: kthehemi te psalmet, për të folur me Zotin e për ta njohur zemrën e Tij.
Një libër i jashtëzakonshëm urate, në të cilin vet Zoti na mëson si Ti drejtohemi
me lutje. Kështu Benedikti XVI e përshkruan Librin e Psalmeve, mbi të cilin foli sot
gjatë katekizmit të audiencës së përgjithshme. Psalmet janë shkolla më e mirë e
lutjes, ku mund “të lëvdosh e të gëzosh”, "të vuash e të shprehesh angështimin”, e
“të lëshosh veten në duar të Zotit”. Psalmet janë fjalë që arritën tek ne përmes shekujsh
e që na zbulojnë aspektet më të thella të jetës së njeriut, të cilit i prinë në njohjen
e zemrës së vet e “të zemrës së Zotit”. Papa Benedikti XVI këtë u kërkoi të krishterëve
që të lutën me psalme, të kthehen e “të marrin në dorë këtë libër të shenjtë” duke
e bërë “udhërrëfyes të jetës së përditshme”. Gjatë audiencës së përgjithshme mbajtur
sot paradite në Sheshin e shën Pjetrit në Vatikan para mase 10 mijë besimtarëve e
shtegtarëve të ardhur prej vendeve të ndryshme, Papa kujtoi se si Psalmet biblike
shprehin “tërë gamen e ndjenjave të ekzistencës njerëzore”, janë “shfaqje e shpirtit
dhe e fesë, ku të gjithë mund të njihemi e të gjejmë vetveten”, shërbejnë për të “folur
me Zotin” por sidomos për të “mësuar se kush është Zoti e për ta njohur zemrën e
Tij”. Gjatë audiencës së përgjithshme Papa Benedikti XVI filloi sot një kapitul
të ri të katekizmit të tij mbi lutjen apo uratën, duke ilustruar librin e Psalmeve
e me këtë rast përdori figurën e Davidit mbret për ti lidhur Psalmet, të lindura nga
feja e Izraelit, me fenë e krishterë. Në Davidin, shpjegoi Papa Racinger, “në një
farë mënyre kemi hijen e misterit të Krishtit” e në Krishtin Psalmet gjejnë “plotësimin
e vet përfundimtar, zbulojnë kuptimin e thellë, flasin për të Birin si shëmbëlltyrë
e Hyjit të padukshëm”. “I krishteri duke lutur Psalmet – nënvizoi Papa – lut Atin
Qiellor në Krishtin e me Krishtin, hynë në misterin pashkor e në horizontin” që vetëm
lutja hap përmasa të papritura me pasuri të pakufishme”.