Prokuroria Speciale e Eulexit, misionit evropian në Kosovë, ka hap një hetim gjyqësor
ndaj Pieter Feith, kreut të Zyrës civile ndërkombëtare (ICO) në Prishtinë, i cili
thuhet se ka ndikuar në emërimin e guvernatorit të Bankës qendrore të Kosovës, Gani
Gërgurit. Në regjistrat e Prokurorisë Speciale, Pieter Feith figuron si një nga
njerëzit që është hetuar nga prokurorë të EULEX’it. Gjithçka pra lidhet me zgjedhjen
e guvernatorit të Bankës Qendrore të Kosovës. Kështu njofton e përditshmja Gazeta
Express e cila sjell dëshmi që përfshin shefin e ICO’së në zgjedhjen e Gani Gërgurit
në postin e guvernatorit, gjë që nxiti nisjen e hetimeve ndaj tij nga prokurorë evropianë. Në
të kaluarën, shefi i ICO’së, Pieter Feith, ishte parë me simpati nga kosovarët, kur
muaj më parë, teksa po formohej Qeveria e re, deklaronte se njerëzit që janë nën hetime
nga drejtësia, nuk duhet të hyjnë në Ekzekutiv. Në një vend me shkallë jashtëzakonisht
të lartë të korrupsionit, deklaratat e holandezit shiheshin si një goditje e fortë
për ministrat që ishin bërë sinonim i zyrtarëve që fusin dorën në arkat e taksapaguesve.