Kisha gjermane, në ndihmë të bashkësisë së krishterë në Irakun e martirizuar.
Përfundoi dje, në Irak, vizita e një delegacioni të Konferencës ipeshkvnore gjermane,
që shkoi pranë bashkësisë katolike irakiane për ta ndihmuar ta kapërcejë situatën
tejet të vështirë. Duke parë si jetojnë të krishterët në këtë vend të martirizuar,
përfaqësuesit e Kishës gjermane u shprehën sivëllezërve në fe, solidaritetin e tyre,
duke u dhënë zemër, por edhe duke studiuar nga afër rrugët më të frytshme për ndihmë
konkrete. Për këtë qëllim, anëtarët e delegacionit u takuan me barinjtë e Kishës irakiane
e edhe me autoritetet më të larta politike në vend. Misionin e kryesoi imzot Ludvig
Shik, kryeipeshkëv i Bambergut dhe kryetar i Komisionit “Kisha botërore”, të Episkopatit
gjerman. Ja edhe përshtypjet e imzot Shik, në mikrofonin tonë:
Përgjigje:
- Situata në Bagdad është krejt e ndryshme nga ajo në Erbil, ku ndodhem
tani, që po ju flas. Në Kirkuk e në Mosul, edhe më e ndryshme. Duhen llogaritur mirë
ndryshimet ndërmjet këtyre qyteteve. Në Jug të Irakut, të krishterët janë shumë të
persekutuar, ndërsa këtu, në veri, jetojnë në paqe. Vetë qeveria e Kurdistanit i mbron
të krishterët: mund të ndërtojnë shtëpi e të gjejnë punë... Në se duam t’i ndihmojmë
me të vërtetë, duhet t’i dallojmë këto situata.
Pyetje: - Shumë
të krishterë vijojnë të ikin nga Iraku: si mund të shmanget një situatë e tillë, që
e dëmton rëndë Kishën në vend....
Përgjigje: - Ka shumë rëndësi
që të krishterët të mbeten në vend, edhe pse kanë formim më të mirë: ndërmjet tyre
ka mjekë, profesorë, mësues... Të krishterët kanë humanizëm të theksuar, që i ndihmon
edhe myslimanët – shiitë e sunitë - e kanë edhe frymën e bashkimit, që mund të ndikojë
për t’i afruar grupet e ndryshme e për të formuar një bashkësi kombëtare: prandaj
janë shumë të nevojshëm në këtë shoqëri.
Pyetje: - A keni vërejtur
ndonjë farë progresi kohët e fundit?
Përgjigje: - Qeveria
e Kurdistanit ka organizuar një polici të krishterë; në qytetet e Veriut, që kujtova
më sipër, ka siguri, por duhet vijuar puna për forcimin e saj e, sidomos, duhen krijuar
vende të reja pune e kushte më të mira jetese. Ne, gjermanët, duhet ta ndihmojmë konkretisht
Kishën kaldeje në Irak, që të mund të hapë shkolla profesionale e t’u krijojë një
perspektivë të re të krishterëve.