Віцебск: урачыстасць абвяшчэння новага катэдральнага касцёла
18 чэрвеня ў Віцебску
адбылася ўрачыстасць абвяшчэння новага катэдральнага касцёла Віцебскай дыяцэзіі. Па
жаданні Святога Айца Бэнэдыкта XVI ім стала новапабудаваныя святыня Езуса Міласэрнага.
Урачыстыя
мерапрыемствы пачаліся яшчэ ўчора. У Віцебску прайшоў сімпозіўм прысвечаны тэме “Сям’я
– праца і святкаванне”, а таксама моладзевы канцэрт, на плошчы перад касцёлам, у якім
прынялі удзел моладзевыя гурты з усёй Беларусі. Сёння, адарацыяй Найсвяцейшага Сакрамэнта
і працэсіяй Божага Цела, ад касцёла св. Духа да новай катэдры, пачалася падрыхтоўка
да кульмінацыі ўрачыстасці – св. Імшы, падчас якой пасланнік Бэнэдыкта XVI кардынал
Робэр Сара, старшыня Папскай рады “Cor unum”, абвясціў новапабудаваную святыню катэдрай,
зачытаўшы спецыяльную булу Пантыфіка. Іерарх таксама зачытаў пасланне кардынала Тарцызіо
Бэртонэ, у якім Дзяржсакратар Апостальскай Сталіцы перадае беларускім вернікам прывітанне
Папы і яго благаслаўленне.
Ва ўрачыстасцях у Віцебску прынялі ўдзел 10 біскупаў,
сярод якіх былі таксама іерархі з Украіны, Латвіі і Польшчы, каля 200 святароў, законнікі
і законіцы, прадстаўнікі дыпламатычнага корпуса і вялікая колькасць вернікаў з Віцебшчыны,
Гродзеншчыны і Міншычыны. Перад святыняй быў устаноўлены светадыёдны экран, з дапамогай
якога, людзі не патрапіўшыя ў катэдру, удзельнічалі ў св. Імшы. Пасля заканчэння літургіі,
моладзь арганізавала на плошчы перад новай катэдрай імправізаваны канцэрт.