Liturgjia e Fjalës së Zotit e festës së Trinisë Shenjte. Lavdi Atit e Birit dhe Shpirtit
Shenjt!
Ja përsëri në takimin tonë javor të së shtunës me Fjalën e Zotit të meshës së dielës,
kësaj radhe do të dëgjojmë e meditojmë së bashku leximet biblike të liturgjisë së
Fjalës Hyjnore të dielës në të cilën Kisha e kremton festën e Trinisë Shenjte. Të
hënën e kaluar, pas solemnitetit të festës së Rrëshajëve, për kalendarin liturgjik
të kishës, ka filluar Koha e rregullt apo Koha gjatë Vitit që shkon deri të dielën
e parë të Kohës së Ardhjes, pra deri në fillimin e një vitit të ri kishtar, pra flasim
gjithnjë për kohën liturgjike të kishës. Siç thamë ,sot kremtojmë solemnitetin
e të Shenjtenueshmës Trini, do të thotë kremtojmë Zotin ashtu siç Ai është, i vetmi
Zot i vërtetë, që ka dashur të na dëftohet. Se Zoti është një, këtë mendja njerëzore
e pati kuptuar e Zoti i qe dëftuar Abrahamit. E ne besojmë se Zoti është Një i vetëm;
është një Zot i vetëm i Qiellit e i Tokës. Po nuk është vetmitar; Ai ka dashur të
na dëftohet si Dashuri – Zoti është Dashuri – e Dashuria është marrëdhënie – relacion
mes personave të gjallë. Atësia, Bijësia e Dashuria e dhuruar dhe e shkëmbyer, janë
shprehje me të cilat ne belbëzojmë duke u shpreh mbi misterin Hyjnor që na përfshinë,
që na bënë pjesëtarë të tij e në të cilin mister e adhurojmë: Zotin e vetëm, Dashuri,
Ati, Biri, Shpirti. Leximi i parë nga libri i Daljes na flet për mëshirën
e pakufishme dhe përdëllimin e Zotit ndaj popullit të tij. Hiri që Moisiu i kërkon
Zotit është vetëm prania e tij hyjnore në mesin e Izraelit. “O Zot, nëse kam gjetur
hir para syve të tu, po të lutëm, udhëto me ne”. Në leximin e dytë marrë nga
Letra e dytë e shën Palit drejtuar Korinstasve, Apostulli u përkujton korintianëve
e neve se frytet e shenjtërisë e të shpëtimit shpirtëror janë meritë e e dhuratë e
Krishtit. Mes tjerash Shën Pali thotë se kushti pse Zoti i paqes e shoqëron me praninë
e tij Kishën është ushtrimi i dashurisë dhe i bamirësisë në gëzim. Leximi i dytë është
një thirrje për të jetuar të gjithë në gëzim, në paqe e në dashuri, sipas imitimit
të Trinisë Shenjte. Pjesën e Ungjillit të kësaj së diele marrë nga Shën Gjon,
nënvizon në fjalët që Jezusi i drejton Nikomedit – dashurinë e lartë të Atit Qiellor
e vlerën shpëtimprurëse të veprës së Birit të Zotit, prej çka pastaj buron misioni
shenjtërues i Shpirtit. Në Ungjill do të dëgjojmë se si Zoti e dëgjon, se si Zoti
e vështron kërkesën për të qenë në mesin e popullit të vet me Mishërimin e Fjalës
Hyjnore. Prania hyjnore shkakton e nxit drejtësi e gjykim, që nuk është dënim, por
shpëtim për atë që beson në Të. Vërtetë, e tërë jeta tokësore e Jezu Krishtit
ka qenë shfaqje e misterit më të bukur , më të thellë e më të pashqyrtueshëm të Hyjit:
e ky mister është Ati, Biri e Shpirti Shenjtë = Një natyrë e vetme Hyjnore në Tri
vehtje ( në tre persona). Leximet biblike të liturgjisë së këtij solemniteti pohojnë
se Zoti është Trini Dashurie për t’u besuar, për t’u dëgjuar e për t’u pranuar në
jetë. Zoti ynë është Zot “bashkësi” ; Ai do që ne ti bashkohemi Atij e në të njëjtën
kohë na thërret të jemi në bashkim edhe me të gjithë vëllezërit e të afërmit tanë
në jetën e përditshme tokësore, në shtegtimit tonë drejt qiellit. Hyjit Atë nuk
është larg nesh: përmes Pagëzimit, Hyji Trini vjen në ne, që ne të bëhemi tempull
i gjallë i pranisë së Tij në kohë e në histori. Kështu pra, detyra e misioni ynë si
besimtarë është ta lavdërojmë Atin, Birin e Shpirtin Shenjtë me lutje e sidomos ta
dëshmojmë me vepra të mira, me vepra drejtësie, dashurie e të vërteta. Hyji Atë
e ka dërguar në botë të Birin e Vet, Fjalën e së Vërtetës, Jezusin, dhe Shpirtin Shenjtë
shenjtërues për të na bërë pjesëmarrës të jetës së tij Hyjnore. Hyji Atë bashkë
me të Birin e Tij Jezus Njëlindurin dhe me Shpirtin Shenjtë, janë Një Zot i vetëm
në Trininë e vehtjeve dhe në Njininë e natyrës. Ai na ka zbuluar këtë mister përmes
Jezus Krishtit, e ne besojmë dhe e dëshmojmë fenë tonë në Hyjin e vërtetë dhe të përjetshëm,
rrëfejmë Njëninë e Natyrës e Barazinë e madhërisë së Trinisë Hyjnore. Të kremtosh
festën e të Shenjtënueshmës Trini për besimtarin domethënë t’i përgjigjesh dëshirës
për ta njohur Zotin gjithnjë më tepër, por edhe të jesh i gatshëm ndaj manifestimit,
shfaqjes së Tij Hyjnore: Ai i pari e dëftoi veten porsi Urti, porsi Fjalë dëftuese,
porsi Dashuri jetike. Kisha na mëson që nga fëmijëria të fillojmë çdo ditë, të
nisim çdo vepër, çdo punë me shenjën e kryqit, që do të thotë të fillojmë dhe të mbarojmë
gjithçka në Emër të Shenjtënueshmës Trini. Me shenjën e kryqit përkujtojmë misterin
e Njësisë e Trinisë së Hyjit, dhe misterin e mundimeve, të vdekjes e ngjalljes së
Jezusit Zot. Edhe kremtimi më solemn liturgjik, që është kremtimi i Meshës shenjte,
Eukaristisë, fillon në emër të Shenjtënueshmës Trini Hyjnore. Meshtari u drejtohet
besimtarëve me këto fjalë: “Hiri i Zotit tonë Jezu Krisht, dashuria e Hyjit Atë dhe
bashkimi i Shpirtit Shenjtë “(qofshin përherë me ju, me ne). Festa e kësaj së diele
e Trinisë Shenjte, është kremtimi liturgjik që meriton të konsiderohet absolutisht
si festa më e rëndësishme ndër të gjitha festat tjera. Për besimtarët, e vetmja
festë qiellore është adhurimi i Trinisë Shenjte nga ana e engjëjve dhe shenjtërve,
në një Hosana të përhershëm këngësh e lavdesh. Trinia është në ne Jezusi
tha: “Unë jam në Atin e Ati është në mua”. Edhe ne mund të themi: “Unë jam në Trininë
e Trinia është në mua”. Në të vërtetë ne jemi Tempull i Zotit. “Kush më do – tha
Jezusi – unë dhe Ati im do të vijmë tek ai e të hamë darkë me të”, e do të vendosim
banesën e përhershme tek ai. Babai i Origjenit (teologut të lashtë kishtar) gjunjëzohej
para fëmijës së vet dhe në të e adhuronte të Shenjtënueshmen Trini. “Ta bëjmë njeriun
sipas shëmbëllimit tonë, të ngjashëm me ne”, thotë Zoti në momentin e krijimit të
Adamit. Në të gjithë prindërit e botës ekziston dëshira për të parë në fytyrën
e fëmijëve tiparet e veta. Mirëpo ne nuk jemi shëmbëllim – imazhi i Zotit për tiparet
“fizike” që kemi – për kokën, duart e këmbët – sepse Zoti nuk ka trup. Secili është
i krijuar në shëmbëllim të Zotit sepse është i pajisur me inteligjencë, me mendje,
me vullnet, me shpirt. Por më shumë se njeriu si individ, është familja ajo që
i pasqyron tiparet trinitare: babai, nëna, fëmija: janë tre persona të ndryshëm, e
megjithatë janë një familje e vetme, një gjë e vetme në dashuri. Zoti, në të vërtetë,
është Familje, është Dashuri. O Zot, Ti je Dashuria, e Vërteta e Jeta. Urtia
e Zotit, e zbuluar, e dëftuar në Jezusin i tregon njeriut të vërtetën mbi vetveten
dhe rrugën për arritur deri tek Ti. Çdo i krishterë është i thirrur ta përjetojë,
ta shijojë këtë përvojë pajtimi me Zotin, në Jezusin, ta njohë vetveten në fytyrën
e Zotit bërë njeri e ta jetojë në fe dashurinë e Zotit për ne. Më tepër mbi
Liturgjinë e Fjalës Hyjnore të festës së Trinisë Shenjte mund të dëgjoni edhe këtu....