Këshilli i OKB-së për të drejtat e njeriut miraton Konventën mbi punën shtëpiake.
Imzot Tomazi:duhet mbrojtur edhe ai, që kryen detyra ‘të padukshme’.
Me rastin e Konferencës së 10-të ndërkombëtare të punës, në Gjenevë, Këshilli i OKB-së
për të drejtat e njeriut miratoi dje, me shumicë votash, Konventën e Organizatës së
Kombeve të Bashkuara për të drejtat e punonjësve të punës shtëpiake. U miratuan edhe
udhëzimet, që krijojnë kushte për t’i vënë menjëherë në jetë disa nga pikat e Konventës.
Folëm me kryeipeshkvin Silvano Maria Tomazi, nga Gjeneva, në mikrofonin tonë:.......
Përgjigje:
- U arrit qëllimi i një etape shumë të rëndësishme; duke pasur parasysh
se në Organizatën ndërkombëtare të punës, diskutimi për mbrojtjen e posaçme të punonjësve
shtëpiakë ka nisur që nga vitet ’60. Gjatë punimeve u theksua në mënyrë të posaçme
se këta punonjës duhen parë si kategori punëtorësh ‘të padukshëm’, sepse punojnë brenda
katër mureve të shtëpisë. E kështu janë edhe sot e kësaj dite. Kjo kategori, shumica
gra e, gjithnjë më shpesh, emigrante, ardhur nga vende të ndryshme për t’u shërbyer,
në familje, të moshuarve e fëmijëve, nuk ka pasur kurrë bashkime profesionale, as
ndonjë formë tjetër për mbrojtjen në punë.
Pyetje: - Cilat janë
porositë kryesore, që u drejtohen qeverive tani, mbas miratimit të Konventës?
Përgjigje:
- Të studiojnë kushtet, që puna të jetë e përshtatshme, e pranueshme.
Të japin lirinë për formimin e bashkimeve profesionale në ndihmë të këtyre njerëzve.
Të ngulmojnë për sigurimin e pagave të drejta e pa dallime. Posaçërisht, të mbrojnë
normat e Konventës së re, duke vënë në plan të parë vëmendjen për të miturit, sidomos
për vajzat e mitura, të cilat në disa vende përdoren, për të mos thënë keqpërdoren,
në punë shtëpiake. Duhen krijuar kushtet që këto vajza, t’i gëzojnë të gjitha të
drejtat në banesën ku strehohen; të kenë të drejtë të dalin, kur nuk punojnë, të pushojnë
një ditë në javë, të punojnë me orar të caktuar. Është fjala për një sërë masash,
normash e të drejtash: një hap shumë pozitiv përpara në mbrojtjen e kësaj kategorie
njerëzish që, sipas statistikave, kapen në rreth 100 milion vetë.
Pyetje:
- Pas impenjimit tuaj, Shkëlqesi, duket edhe puna e shumë katolikëve, që u përpoqën
për realizimin e këtij dokumenti... Përgjigje: - Në të vërtetë,
grupe si Veprimi katolik ndërkombëtar për emigracionin, Lidhja për punonjësit shtëpiakë
në Indi, Vepra ndërkombëtare Kolping e shumë organizata me frymë katolike, kanë punuar
me këmbëngulje për të arritur këtë sukses. E do të vijojnë të punojnë, sepse Konventa
e re duhet ratifikuar në vende të ndryshme të botës, për të folur, pastaj, për sukses
të plotë.