Расійскі муфцій просіць “Аль Азхар” абараніць хрысціян
У Расійскай асацыяцыі
ісламскай згоды (Усерасійскім муфціяце) выказалі занепакоенасць становішчам хрысціян
у арабскіх краінах. “Мусульмане Расіі з трывогай глядзяць на зыход хрысціян з Ірака,
палестынскіх земляў, іншых частак Блізкага Усходу. Вымушаны зыход хрысціян з мусульманскіх
земляў супярэчыць нормам нашай святой веры”, - гаворыцца ў лісце старшыні Савета улемаў
муфціята Фарыда Салмана рэктару “Аль-Азхар”, старажытнага ісламскага ўніверсітэта
ў Егіпце, Ахмаду ат-Таібу.
Па словах муфція, спроба “распаліць варожасць” паміж
мусульманамі і хрысціянамі Егіпта “з’яўляецца вялікім грахом” і адпавядае “пачатку
вайны супраць Усявышняга, бо гэтыя дзеянні супярэчаць Божым законам”. “Зыход хрысціян
з краін Блізкага Усходу, напады на храмы і кляштары, забойствы святароў і захопы хрысціянскіх
закладнікаў з'яўляюцца лепшым падарункам відавочным і тайным ворагам ісламу і адной
з прычын ісламофобіі, якая пашыраецца ва ўсім свеце”, - гаворыцца ў лісце. Салман
асцярагаецца, што гэта можа стаць прычынай ганенняў на мусульман ў тых краінах, дзе
яны не з’яўляюцца большасцю насельніцтва.
Напярэдадні з ат-Таібам сустрэўся
кіраўнік Сінадальнага Аддзела знешніх царкоўных сувязяў Мітрапаліт Валакаламскі Іларыён. Ён,
у прыватнасці, выказаў заклапочанасць узростам антыхрысціянскіх настрояў у частцы
егіпецкага грамадства. Іерарх высока ацаніў перспектывы стварэння арганізацыі “Наш
дом – Егіпет”, членамі якой, як мяркуецца, могуць быць як мусульмане, так і хрысціяне. З
гэтай ідэяй нядаўна выступіў ат-Таіб. Арганізацыя будзе весці працу па ўмацаванні
міжрэлігійных сувязяў, змагацца з распаўсюджваннем радыкальных поглядаў і заклікаць
егіпцян да нацыянальнага адзінства, незалежна ад рэлігійнай прыналежнасці.