Papa për Rrëshajë: Kisha përqafon mbarë popujt, pavarësisht nga racat, klasat, kombet.
Kisha është katolike, domethënë, me porta të hapura për të gjithë, sepse Shpirti i
Shenjtë e krijoi si Kishë të të gjithë popujve, përtej racave, klasave, kombeve. Këtë
pohoi dje Papa në homelinë e Meshës, kryesuar në solemnitetin e Rrëshajëve, në Bazilikën
e Shën Pjetrit, në Vatikan. Benedikti XVI nënvizoi se Kisha, po të ishte vepër e njeriut,
tashmë do të qe shuar nga faqja e dheut. Në uratën e Mbretëreshës Qiellore, iu
lut Shpirtit Shenjt që paqja e dialogu në botë të ngadhënjejnë mbi armët dhe respekti
për dinjitetin e njeriut, mbi interesat egoiste.
Rrëshajët e Babeli, dy realitete
të pranishme edhe sot në një botë, ku vijon ndeshja e të kundërtave: dashuri e urrejtje,
bashkim e përçarje, respekt e poshtërim, drejtësi e padrejtësi. Papa shpjegoi se festa
e Rrëshajëve, është festa e krijimit, festa e Shpirtit Krijues: “Për ne,
të krishterët, bota është fryt i aktit të dashurisë së Zotit, që krijoi të gjitha
sendet, e për të edhe gëzohet, sepse është ‘gjë e mirë’, ‘gjë shumë e mirë’ (cfr
Gen 1,1-31). Prandaj Zoti nuk është Tjetri, Ai që nuk mund të merret nëpër
gojë, duke ia përmendur emrin, i errët, i pakapshëm. Zoti dëftohet, ka një fytyrë,
Zoti është arsye, Zoti është vullnet, Zoti është dashuri, Zoti është bukuri”. Një
bukuri e shpërfytyruar nga mëkati i njeriut, që bëri të nevojshëm shpërblimin e Krishtit.
Jezusi i ngjallur frymon mbi dishepujt, që marrin Shpirtin Shenjt. Hyjmë në misterin
e Rrëshajëve: “Nga rrumuja e Babelit, nga zërat që këlthasin njëri kundër
tjetrit, tek një shndërrim i plotë: turma potermadhe, bëhet bashkim i larmive e, për
virtyt të pushtetit bashkues të së Vërtetës, rritet mirëkuptimi”. T’i jetosh
Rrëshajët, do të thotë ta kuptosh tjetrin, që ndryshon nga ti. Përmes fesë, shpresës
e dashurisë, formohet një bashkësi e re e Kishës së Hyjit. E është Shpirti Shenjt
ai, që i jep jetë Kishës: “Ajo nuk zë fill nga vullneti njerëzor, nga reflektimi,
nga aftësia e njeriut e as nga zotësia e tij organizative. Po të ishte kështu, Kisha
do të qe shuar me kohë, do të kishte kaluar, ashtu si kalon çdo gjë njerëzore. Por
ajo nuk kalon, sepse është Korpi i Krishtit, që e merr frymën prej Shpirtit Shenjt”. Me
Rrëshajët, shemben të gjitha muret, sepse Shpirti Shenjt përhap dashurinë, që përqafon
çdo gjë. Prandej Kisha është katolike, që nga çasti i parë i krijimit të saj: “Që
nga çasti i parë, Shpirti Shenjt e krijoi si Kishë të të gjithë popujve; si frymë,
që përqafon mbarë botën, që kapërcen të gjithë kufijtë e racave, të klasave, të kombeve;
që i shemb të gjitha muret e i bashkon të gjithë njerëzit në një besojmë të vetme:
në atë të Zotit Trini. Që nga zanafilla, Kisha është një, katolike e apostolike: kjo
është natyra e saj e vërtetë e si e tillë edhe duhet pranuar. Ajo është shenjte, jo
falë aftësive të anëtarëve të saj, por sepse vetë Zoti, me Shpirtin e Tij, e krijon,
e pastron, e shenjtëron”.Në përfundim të homelisë, Papa komentoi fragmentin
e Ungjillit të djeshëm, që kujton sesi dishepujt galdojnë duke e parë Jezusin e ngjallur,
jo vetëm sepse rikthehet Miku i humbur, por sepse në këtë rikthim ka diçka shumë
më mahnitëse:
“Sepse Miku i humbur nuk vjen nga një vend çfaredo, por
nga nata e zezë e vdekjes; e ai e ka kapërcyer këtë kufi! Ai nuk është dokushdo, por
Miku e njëkohësisht, Ai është e Vërteta, që jep jetë; e ky, që dhuron, nuk është gëzim
dosido, por është vetë gëzimi, dhuratë e Shpirtit Shenjt. Po, është e bukur jeta,
sepse më duan, më do vetë e Vërteta!”.