11 і 12 чэрвеня ў
Мінску праходзіла акцыя “У абарону жыцця”. Яна была арганізавана прадстаўнікамі каталіцкіх,
праваслаўных і пратэстантцкіх рэлігійных арганізацый. У дзіцячых парках імя Горкага,
Чалюскінцаў, а таксама на вуліцы Няміга валанцёры і прафесійныя псіхолагі раздавалі
маладым людзям інфармацыйныя буклеты і размаўлялі аб згубнасці і шкодзе абортаў і
каштоўнасці чалавечага жыцця ад зачацця да натуральнай смерці.
Яны падкрэслівалі,
што аборт, які многія называюць метадам кантралявання нараджальнасці, па сутнасці
з’ўляецца забойствам. Для жанчыны ён мае цяжкія наступствы: смерць, бясплоддзе і глыбокія
псіхалагічныя траўмы. Як адзначыла каардынатар праграммы, псіхолаг Таццяна Фірысюк,
існуе шмат выпадкаў, калі жанчына робіць гэты крок, таму што не ведае, на што ідзе,
проста не мае дакладнай інфармацыі. А калі атрымлівае яе, часта змяняе папярэдняе
рашэнне.
Кожны год у свеце дзве трэція цяжарнасцяў заканчваюцца абортам.
Краіны СНД ў гэтай статыстыцы – на першым месцы ў Еўропе. Па дадзеных Міністэрства
аховы здароўя Беларусі за апошнія пяць гадоў колькасць абортаў скарацілася ў пяць
разоў (раней яна перавышала ў два разы нараджальнасць), але і гэта статыстыка не суцяшае:
толькі па афіцыйных дадзеных на 100 родаў у Беларусі прыходзіцца 38 абортаў. Акцыя,
якая прайшла сёння ў Мінску, не аднаразовая, валанцёры сістэматычна наведваюць універсітэты
і студэнцкую паліклініку, дзе асабіста размаўляюць з маладымі людзьмі аб каштоўнасці
жыцця, асабліва ненароджанага.