Shefat e armatave të vendeve ballkanike takohen në Ohër
Konferenca e pestë e shefave të shtatmadhorive të armatave nga vendet ballkanike filloi
sot punimet e saj në Ohër, që u hapen nga presidenti i Maqedonisë, Gjorge Ivanov,
i cili shprehi bindjen se bashkëpunimi në fushën e sigurisë bazohet në vlera, interesa
dhe prioritete të ndara dhe se në mënyrë të vazhdueshme e me përkushtim sendërtohet
përmes obligimeve, detyrave dhe përgjegjësive të përbashkëta. Në Konferencën në
Ohër marrin pjesë shefat e SHM të forcave të armatosura (FA) të Maqedonisë, Shqipërisë,
Bosnjë e Hercegovinës, Bullgarisë, si dhe zëvendësit e SHM të Greqisë, Rumanisë, Serbisë,
komandanti i Armatës së tretë turke, si dhe SHM i FA të Malit të Zi. Ivanov shprehi
kënaqësinë që liderët ballkanik gjatë dhjetë viteve të fundit, të motivuar nga agjenda
e përbashkët evropiane, me qëllim që t'u sigurojnë banorëve të vet një jetë të lirë,
të sigurt dhe cilësore, filluan një faqe të re të historisë së përbashkët. Shefi
i Shtatmadhorisë së ARM së, gjeneralnënkoloneli Mirosllav Stojanovski, nga ana e tij
theksoi se forumi në Ohër paraqet një reflektim të përpjekjeve të përbashkëta për
partneritet të përforcuar sipas konceptit strategjik të NATO s, por edhe realizimin
dhe promovimin e sigurisë dhe të stabilitetit të qëndrueshëm rajonal.