Në Turqi, nunci apostolik kujton imzot Padovezen dhe lutet për lirinë fetare.
(08.06.2011 RV)Imzot Antonio Luçibelo, nunc apostolik në Turqi, së bashku me
imzot Françeskinin dhe përfaqësues të Kishës ortodokse e armene, kujtoi, në Iskenderun,
figurën e imzot Luigji Padovezes, mëkëmbës apostolik i Anatolisë, vrarë nga shoferi
i tij, më 3 qershorin e vitit të kaluar. Prania jonë në këtë vend – deklaroi imzot
Luçibelo në Agjencinë AziaNjuz - është e paktë në këndvështrimin numerik: jemi sa
një famulli e vogël në një vend perëndimor. E megjithatë, dëshmia jonë e urtë, sjell
gjithnjë fryte, shikohet me nderim e ndiqet. Për nuncin, edhe sivjet, vit, që i shtoi
një martir të ri misionit në Turqi, pa llogaritur sinjale të tjera dhune, Kisha mundi
ta thellojë misionin e saj. Kisha– theksoi – po jeton kalimin “nga prania, në dëshmim”.
Kjo parrullë, që u përdor në një takim kishtar, mbajtur në Turqi, në vitet ’80, mbetet
ende aktuale. Nuk është nevoja për një prani të potershme, me bori e trumbeta. Themelore
është ta kumtosh Krishtin me jetën tënde, përmes një dëshmie të urtë, që nuk imponohet,
duke dhënë shfaqje. Përvujtëria e dëshmimi – vijoi imzot Luçibelo – korrigjojnë
përshtypjen që kanë njerëzit e këtushëm për Kishën katolike, si organizatë e pushtetshme.
Ta kesh mirë parasysh këtë, ka rëndësi të madhe. Lidhur me ecjen e Turqisë drejt
Evropës, imzot Luçibelo shpreson shumë. Por edhe nënvizon se pika më themelore, është
liria fetare. Një liri e tillë nuk ka vetëm kuptimin e lirisë së kultit – saktëson
– por edhe të asaj të ndërgjegjes. Është për t’u nënvizuar se çdo njeri duhet të ketë
mundësi të besojë ose të mos besojë, e edhe të ndërrojë fe.