Bashkimi Evropian vendos t’i japë fonde bujqësisë. Dëme nga psikoza e bakterit vrasës
Komisari evropian për bujqësinë, Daçian Çolos paraqiti sot pasdite në Bruksel një
propozim të ri për ndihma evropiane në sektorin e prodhimit të frutave e të perimeve,
i cili është dëmtuar jashtëzakonisht nga psikoza e krijuar prej epidemisë së bakterit
Esheria Koli. Sipas këtij propozimi, perimet e pashitura do të tërhiqen nga Evropa
dhe përqindja e shpërblimit për prodhuesit e dëmtuar do të rritet. Kërkesa u bë dje,
gjatë Këshillit të jashtëzakonshëm të ministrave evropianë të bujqësisë. Votimi përfundimtar
i propozimit do të bëhet në Komitetin e veçantë të bujqësisë, i cili do të mblidhet
të martën e ardhshme, po në Bruksel. Ndërkaq, pas 25 viktimave e 2400 të infektuarve,
duket se epidemia po shuhet. Numri i personave, që u drejtohen spitaleve gjermane
është ulur ndjeshëm. Gjithsesi, akoma nuk dihet cila është vatra e përhapjes së kësaj
forme tepër të rëndë të Esheria Kolit. Analizat vazhdojnë pa ndonjë rezultat, por
deklaratat e Ministrisë gjermane të Shëndetësisë tërhoqën vëmendjen herë mbi një lloj
perimesh e herë mbi një tjetër, duke shkaktuar vetëm panik. Si pasojë, shitblerja
e perimeve në Evropë u ul ndjeshëm, duke i shkaktuar dëme të mëdha bujqësisë. Nga
Australia vjen zgjidhja për neutralizimin e bakterit Esheria Koli. Mëse dhjetë vjet
më parë, dy punonjës shkencorë të universitetit të Adelaides patën krijuar në laborator
një bakter të padëmshëm, me aftësinë për të kapur e neutralizuar helmin Shiga, të
prodhuar nga Esheria Koli. Arritja u publikua edhe në revistën “Nature Medicine”,
në vitin 2000, por si zakonisht kur nuk ka ndonjë epidemi, nuk pati interes nga ana
e ndërmarrjeve farmaceutike për të prodhuar kurën përkatëse.