Shqipëri: Kolegji Zgjedhor. PS gati padia tjetër për kundërshtimin e vendimit për
ndryshimin e rezultati për Tiranën
PS-ja nuk pajtohet me vendimin e Kolegjit Zgjedhor. Partitë tjera e vlerëson si të
drejtë dhe të pakontestueshëm vendimin e Kolegjit Zgjedhor, si i vetmi organ për të
dhënë vullnetin kushtetues ne situatat post zgjedhore. Partia Socialiste pritet të
kërkojë që të verifikohet edhe çështja e mospërputhjes së numrit të votave me numrin
e votuesve te gjendura ne kutitë për këshilltarë të bashkisë së Tiranës. Sipas burimeve
nga selia rozë, e marta do të jetë shansi i fundit i socialisteve për betejën për
kryeqytetin. Këtë herë përveç padisë për kundërshtimin e vendimit për ndryshimin
e rezultatit, socialistët do të kërkojnë që të verifikohet edhe çështja e mospërputhjes
së shifrave. Mospërputhja e shifrave është pranuar edhe nga anëtarë të KQZ-së,
por është shpjeguar me pretendimin se fletët që janë tepër në në kutitë për kandidat,
mungojnë në kutitë për këshilltarë. Sipas shifrave zyrtare të KQZ-së, në kryeqytet
kanë marrë pjesë në zgjedhje 256.507 qytetarë. Juristët e PS janë në pritje të
zbardhjes së vendimit të Kolegjit Zgjedhor për të ndërmarrë edhe nismën ligjore. Vendimi
i Kolegjit Zgjedhor pritet të zbardhet ditën e hënë dhe socialistët do të kenë kohë
24 orë për t'a shqyrtuar dhe për të hartuar edhe kërkesën e re që pritet të depozitohet
në Kolegjin Zgjedhor. Kolegji Zgjedhor komunikoi mbrëmjen e së premtes së kaluar
vendimin për të pushuar çështjen që ka si objekt kërkesën e PS-së për të shpallur
pavlefshmërinë e vendimeve të KQZ-së për rezultatin e Tiranës, duke lënë kështu në
fuqi vendimin e KQZ-së, i cili shpall fitues me 81 vota avantazh kandidatin e koalicionit
"Aleanca për qytetarin", Lulzim Basha. Kolegji Zgjedhor ka tre ditë afat për të
zbardhur vendimin me të cilin pushoi kërkesën ankimore të Partisë Socialiste, e cila
kundërshtonte KQZ-në për vlerësimin e fletëvotimeve të kontestuara për kryetarin e
Bashkisë së Tiranës. Sipas nenit 158 të Kodit Zgjedhor, Kolegji është i detyruar
të zbardhë vendimin jo më vonë se tre ditë nga data e dhënies së tij. Sipas nenit
158 të Kodit Zgjedhor, në varësi nga çështjet në shqyrtim, Kolegji Zgjedhor mund të
vendosë për a) pushimin e gjykimit, b) gjykimin e çështjes në themel ose c) detyrimin
e KQZ-së për të marrë vendim.