Papa familjeve kroate: “Mbrojeni jetën e dëshmojeni bukurinë e dashurisë bashkëshortore
e kristiane”.
Papa u nis rreth orës 9.00 nga nunciatura apostolike, drejt hipodromit të Zagrebit,
në breg të lumit Sava, ku e prisnin më se 400 mijë besimtarë. 100 mijë më shumë nga
parashikimi i organizatorëve. Këtu Benedikti XVI kremtoi Meshën solemne të Ditës kombëtare
të familjeve katolike kroate, në nëntëqind vjetorin e themelimit të dioqezës së Zagrebit.
Mbajti homelinë e kremtoi lutjen e Mbretëreshës Qiellore. Nga hipodromi i Zagrebit,
e dërguara e Radio Vatikanit, Giada Akulino:
“Familja tradicionale,
që përballon vështirësi e kërcënime; paprekshmëria e jetës njerëzore, nga zënia, në
perëndimin natyror, krijimi i jetës së re. Por edhe kontributi i ‘kishave të vogla
shtëpijake’ për ungjillëzimin e botës. Janë këto, disa nga temat që preku sot paradite
Benedikti XVI, gjatë Meshës Shenjte, kremtuar në Zagreb, me rastin e Ditës së parë
kombëtare të familjeve katolike kroate, në qendër të vëmendjes së Papës, në shtegtimin
e tij të 19-të apostolik ndërkombëtar. Familja, realitet themelor i jetës
njerëzore, në Kroaci, ashtu si gjetiu, duhet të përballojë vështirësi e kërcënime,
prandaj ka nevojë të ungjillëzohet e të ndihmohet – ishte thirrja e Benediktit XVI,
që u prit nga një turmë prej 400 mijë vetësh, në hipodromin pak hapa larg lumit Sava,
e u përshëndet nga një mijë meshtarë e 60 ipeshkvij, kroatë e të ardhur nga viset
fqinje. Ndërmjet tyre, shumë shqiptarë. Benedikti XVI iu drejtua menjëherë familjeve
të krishtera, burim vendimtar për edukimin fetar, për fuqizimin e bashkimit të Kishës
e për praninë e saj misionare në të gjitha rrethanat e jetës: “Përkrah veprimtarisë
së Kishës, ka shumë rëndësi dëshmia dhe impenjimi i familjeve të krishtera, dëshmia
juaj konkrete, posaçërisht për të pohuar pacënueshmërinë e jetës njerëzore, nga zënia
deri në mbarimin e saj të natyrshëm, vlerën unike, të pazëvendësueshme të familjes,
themeluar mbi martesën dhe nevojën e masave ligjore, që i ndihmojnë familjet për ta
kryer detyrën e edukimit të fëmijëve”. Papa i ftoi familjet ta përballojnë
me guxim mendësinë e shekullarizuar, e cila e propozon bashkëjetesën si kohë që të
përgatit për martesë, madje që mund edhe ta zëvendësojë vetë martesën, duke kujtuar
se njeriu mund të dojë pa asnjë rezervë e të vihet në shërbim të tjetrit, ashtu si
Krishti: “Të dashura familje, gëzojeni atësinë e amësinë! T’i hapësh rrugën
jetës, do të thotë t’i hapësh rrugën së ardhmes, besimit në ardhmërinë E të respektosh
moralin natyror, do të thotë ta çlirosh njeriun, në vend që ta poshtërosh. E mira
e familjes, është edhe e mira e Kishës!”. Duke kujtuar rrethanat e sotme
botërore, posaçërisht ato evropiane, Papa skicoi një kuadër të shoqërisë së sotme: “Për
fat të keq, duhet të pranojmë se, posaçërisht në Evropë, vijon të përhapet shekullarizimi,
që çon në përjashtimin e Zotit nga jeta e në shpërbërjen, në rritje, të familjes.
Absolutizohet liria pa impenjime për të vërtetën e kultivohet si ideal, mirëqenia
vetjake, përmes konsumit të të mirave materiale dhe përvojave kalimtare, duke e lënë
fare mbas dore cilësinë e marrëdhënieve me njerëzit e me vlerat njerëzore më të çmuara;
dashuria kufizohet në emocion sentimental, në kënaqjen e ngacmimeve instinktive, pa
u impenjuar për të krijuar lidhje të qëndrueshme reciproke, që i hapin udhën jetës
së re. Jemi të thirrur t’i kundërvihemi një mendësie të tillë!”. Duke kujtuar
tre shtegtimet e të Lumit Gjon Pali II në Kroaci, më ’94,’98 e 2003, Benedikti XVI
theksoi se familja e krishterë ka qenë gjithnjë rruga e parë e transmetimit të fesë;
e edhe sot është vatër e çmuar për ungjillëzimin.E duke u kthyer tek leximet
biblike të së Dielës VII të Pashkëve, ndërmjet ‘Të Ngjiturit të Krishtit në qiell’
e ‘Rrëshajëve’, Papa i nxiti barinjtë të vijojnë, të parët, punën për formimin fetar
të breznive të reja, përgatitjen e tyre për martesë dhe për shoqërimin e familjeve.