Kryeipeshkvi Zhupan kërkon ligje në mbrojtje të të drejtave të familjes.
Në përshëndetjen drejtuar Papës, pas kardinalit Josip Bozaniç, kryeipeshkëv i Zagrebit,
kryeipeshkvi Valter Zhupan, kryetar i Komisionit të Konferencës ipeshkvnore kroate
për familjen dhe jetën, nënvizoi: “Sot të gjithëve u njihet e drejta për t’i shprehur
lirisht opinionet e veta. Prej këndej, edhe ne, që përfaqësojmë shumicën e popullit
kroat, të nënshtetasve të Republikës së Kroacisë, kërkojmë të drejtën për të jetuar,
për t’i shprehur publikisht vlerat, për ta konsideruar të drejtë natyrore lindjen
në një familje të përbërë nga një nënë e një baba. E sidomos, të drejtën të mos e
quajmë progres, atë që e çon njeriun drejt vdekjes”. Imzot Zhupan vijoi të kujtonte,
gjithnjë në përshëndetjen drejtuar Papës, se pikërisht mbi stabilitetin e familjes,
bazuar mbi vlerat e krishtera, u themelua Kontinenti i Vjetër dhe Kroacia, që ka qenë
gjithnjë pjesë përbërëse e Evropës.Jemi të bindur – vijoi prelati - se pikërisht mbi
këto vlera duhet ta bazojmë edhe ardhmërinë tonë, duke mbrojtur të drejtën e pacënueshme
për të jetuar e për t’i shprehur publikisht, sepse përmes tyre na dhurohet jeta. Dëshirojmë
që fëmijët tanë, theksoi prelati – të kenë, edhe sot, të drejtën t’i thërresin prindërit,
“nënë” e “babë”; të drejtën që të pohojnë publikisht se janë pikërisht
një nënë e një baba që u dhuruan jetën. E kemi të drejtë edhe të kërkojmë që qeveritarët
tanë ta rishikojnë ligjin për ndërprerjen vullnetare të jetës së sapozënë në kraharorin
e nënës, që hyri në fuqi në Kroaci në vitin ’78, kur besonim se kohë të tilla kishin
marrë fund përgjithmonë.