Të rinjve në lutje, para Zojës së Portës së Gurit në Zagreb, Benedikti XVI u këshilloi
ta lënë Krishtin t’i marrë për dore e t’i udhëheqë në lartësitë, ku banon Zoti.
Zoja e Portës së Gurit, Pajtorja e Zagrebit, për të cilën kroatët kanë një devocion
shumë të lashtë, madje edhe më të lashtë se dogma e Zojës së Papërlyer, qe ajo, që
i dha një atmosferë të veçantë krejt lutjes me të rinjtë në sheshin Josip Jelaçiç
të kryeqytetit. Pasi janë lutur në praninë e figures së saj në të gjitha famullitë
e pasi kanë shkuar në shtegtim me të, të rinjtë e sollën në procesion dhe e vendosën
mbi podiumin, ku do të qëndronte më pas Papa. Benedikti XVI nuk mundi të mos vërente
se si ky shesh, zakonisht i zhurmshëm, u kthye gati në një tempull, ku në heshtje
të plotë, të rinjtë adhuronin të Shenjtnueshmin Sakrament. E nuk mungoi as të falenderonte
dy të rinjtë, që sollën në shesh dëshminë e tyre të fesë. “Të gjithë
e dimë – u tha Papa – se në zemrën e secilit banon një dëshirë e fortë për lumturi.
Çdo veprim, çdo vendim, çdo ndjet mban në vetvete këtë kërkesë të natyrshme. Por shpesh
vërejmë se u kemi besuar realiteteve, që nuk e plotësojnë këtë dëshirë, madje tregohen
krejt të papërshtatshme. E në këto çaste, ndjejmë nevojën për diçka që shkon ‘përtej’,
që i jep kuptim jetës së përditshme”. “Çfarë kërkoni?” Papa u bëri të rinjve
të njëjtën pyetje, që Jezu Krishti u bën dishepujve të parë. Zoti ua ka dhënë rininë,
u tha Ati i Shenjtë të rinjve të Zagrebit, që pikërisht në këtë periudhë të zbuloni
domethënien e ekzistencës suaj, pavarësisht nga frika e nga gabimet e rrugës. “Lejojeni
Jezusin t’ju marrë për dore! Lejojeni të hyjë gjithnjë e më shumë në rrugën tuaj si
mik e shok! Besojini dhe nuk do t’ju zhgënjejë kurrë”. Benedikti XVI përmendi
Ditën Botërore të Rinisë në Madrid dhe shembullin e të Lumit kroat Ivan Merz, që e
kaloi jetën në shërbim të të rinjve, duke vdekur ai vetë në moshën 32 vjeçare e duke
sjellë në botë, siç tha Papa, “aromën e mirë të Krishtit”. “Mos u çorientoni nga premtimet
për suksese të lehta – i porositi Ati i Shenjtë të rinjtë, para se t’i dhuronte një
Rruzare Zojës e të largohej nga sheshi Josip Jelaçiç, ku vazhdon lutja edhe ndërsa
ne po transmetojmë. Mos u tundoni nga pasuria, nga gjërat materiale, duke hequr kështu
dorë nga zbulimi i asaj së vërtete, që shkon përtej, si një yll lart në qiell, ku
Krishti dëshiron t’ju çojë. Lëreni t’ju udhëheqë në lartësitë qiellore, aty ku është
Zoti.