Kryetari i ipeshkvijve kroatë: shtegtim Papnor për të rizgjuar ndërgjegjet, në një
çast krize.
Si gjithnjë, vizita apostolike e Benediktit XVI, kremtohet nën shenjën e një motoje
themelore, të përhershme. Për të na flet imzot Marin Srakiç, kryeipeshkëv i
Gjakovo-Osijek, kryetar i Konferencës ipeshkvnore kroate, nga Zagrebi, në mikrofonin
e Radio Vatikanit:
Përgjigje: - Si moto të shtegtimit të
Atit të Shenjtë, Konferenca ipeshkvnore kroate zgjodhi “Së bashku në Krishtin”. Shprehu,
kështu, dëshirën për bashkimin e të gjitha niveleve në Krishtin. Bashkimi në Krishtin
na kujton vetë natyrën e Kishës, thellimin e identitetit kishtar të familjes e të
thirrjes së krishterë. E jo më pak, detyrën për të qenë më të pranishëm në shoqëri,
falë impenjimit tonë për të mirën e përbashkët, dhurimit të vetvetes e forcës së Kryqit.
Ati i Shenjtë vjen të na vizitojë në një çast, kur mbarë bota, e me botën edhe populli
ynë kroat, jeton në atmosferën e një krize të rëndë kulturore, ekonomike e politike,
pas së cilës fshihet një tjetër krizë, edhe më e thellë: ajo shpirtërore. Kjo krizë
ka si pasojë përhapjen gjithnjë më të madhe të indiferencës, të theksimit të divergjencave
ideologjike e të tipeve të tjera. Sundon një farë apatie. Ndjehet fort skepticizmi,
amullia, lodhja shpirtërore. E kur i krishteri ka nevojë për energji të reja, Papa,
si atë i të gjithë besimtarëve, me dashurinë e tij, na prin në det të hapur, ku mund
të shikojmë një ardhmëri shumë më të qetë.
Pyetje: - Të dielën,
më 5 qershor, Papa do të marrë pjesë në takimin kombëtar të familjeve kroate. Ç’mund
të na thoni pikërisht për familjet? E sa prej tyre priten të jenë të pranishme në
takimin me Papën, më 5 qershor?
Përgjigje: - Si arsye kryesore
të vizitës apostolike, duke iu përgjigjur ftesës sonë, Ati i Shenjtë theksoi kremtimin
e Takimit kombëtar të familjeve kroate, që Kisha jonë e organizon për herë të parë.
Me këtë kremtim duam të tërheqim vëmendjen e shoqërisë kroate, të institucioneve e
të mjeteve të komunikmit, që të vënë theksin mbi martesën e mbi familjen, si qelizë
jetike e popullit kroat dhe e mbarë shoqërisë kroate. Dëshirojmë të shkundim ndërgjegjet,
t’i zgjojmë nga dremitja, duke u kujtuar, me forcën që na jep prania e Papës, se familja
përfaqëson qelizën e pazëvendësueshme embrionale të jetës së popullit e të Kishës
kroate. Ajo nuk është vetëm burim i jetës së re, por edhe bërthamë ideale, në të cilën
njeriu mund të rritet fizikisht e shpirtërisht. Jemi të vetëdijshëm se ardhmëria e
lumtur dhe rilindja e një populli, mund të realizohen vetëm përmes familjes. Pa harruar
se, për fat të keq, sot familja ndodhet nën trysninë e fortë të individualizmit, të
hedonizmit e të materializmit praktik. Prej këndej, një numër gjithnjë më i madh çiftesh,
të lidhur me sakramentin e martesës, vijojnë të shpërbëhen. Ka shumë ndikime që, jo
vetëm i mohojnë, por edhe i sulmojnë haptazi vlerat e martesës e të familjes. Si pasojë
kemi edhe një numër gjithnjë në rënie të lindjeve. Në Sheshin e Ban Jelaçiç
të Zagrebit, do të jenë të pranishëm më se 25 mijë të rinj; në hipodrom, presim së
paku 300 mijë vetë, ose më shumë. Njerëzit tanë, në raste të tilla, janë të paparashikueshëm.
Pyetje:
- Shkëlqesi, ç’kujtoni sot nga lufta e viteve ’90 në Kroaci?
Përgjigje:
- Plagët e luftës së viteve ’90 janë akoma të pambyllura: fabrikat, shtëpitë,
kishat e rrënuara, nuk janë rindërtuar akoma. E plagët e luftës nuk kanë lënë gjurmë
vetëm mbi gurët, por sidomos, mbi shpirtrat. Të shumta janë ndër ne plagët psikologjike,
ndonëse kemi bërë hapa vigane përpara përsa i përket edukimit me frymën e faljes,
të pajtimit e të bashkëpunimit të përditshëm ndërmjte qytetarëve kroatë të kombësive
kroate e serbe.
Pyetje: - Cili ishte ndikimi i të Lumit Stepinac
mbi Kroacinë gjatë luftës?
Përgjigje: - Figura e të Lumit
Stepinac ishte simbol i shpresës e i papërkulshmërisë, në çaste të vështira të historisë
në të kaluarën e afërt. Motoja e tij ishte “Në Ty, o Zot, shpresova”. Figura e tij
u dha e u jep guximin e fesë, katolikëve kroatë. E shembulli i tij ushqen shpresën
e krishterë të popullit kroat.
Pyetje: - Një kujtim nga vizita e
Gjon Palit II?
Përgjigje: - Gjon Pali II e vizitoi vendin
tonë tri herë. Populli kroat ruan një kujtim të paharrueshëm për të Lumin Gjon Pali
II. Selia e Shenjtë ishte ndër të parat që, në vitin 1991, e njohu Republikën e Kroacisë
si shtet të pavarur.
Pyetje: - Sot vendi, që pret vizitën e Papës,
ecën drejt afrimit përfundimtar në Bashkimin Evropian…
Përgjigje: -
Papa Benedikti XVI vjen mes nesh në çastin kur Kroacia i afrohet Bashkimit Evropian.
Kujtojmë akoma fjalët e tij atërore, drejtuar ne, ipeshkvijve, pesë vjet më parë,
me rastin e vizitës ‘ad Limina’. Na pati thënë: “Vendi juaj, Kroacia, jeton prej kohe
në kornizën e qytetërimit evropian e, me të drejtë, dëshiron edhe të njihet si anëtare
e Evropës së Bashkuar. Me hyrjen në këtë institucion, ajo dëshiron të bashkëpunojë
për të mirën e të gjithë banorëve të Kontinentit. Duke ju nxitur të vijoni ecjen në
këtë rrugë, ju siguroj mbështetjen e Selisë së Shenjtë, që e ka vlerësuar dhe e ka
dashur gjithnjë Kroacinë”.