Më 2 qershor kalendari kishtar përkujton shën Marçelinin e shën Pjetrin, martirë
Marçelini e Pjetri ishin të dy të krishterë të bashkësive të para romake. Po sa u
zbulua se kishin përqafuar fenë e Krishtit, u zvarritën jashtë qytetit, në një vend
që njihet me emrin “Dy Lasuret”, gjatë Rrugës romake Labikana, pranë trojeve të lateranëve,
pikërisht atje ku sot lartohet Bazilika e famshme e Shën Gjonit në Lateran (Romë),
njëra nga bazilikat patriarkale romake e seli e ipeshkvit të Romës. Këtu, Marçelinin
e Pjetrin i detyruan t’i bëjnë varrin vetes duke e gërmuar me duar. Si u bë gati gropa,
ua prenë kokat për shkak të fesë së tyre në Krishtin, në zonën Torpinjatara (Torpignattara)
rrugës Kazilina (Casilina) më 2 qershor të vitit 302. Trupat e tyre të martirizuar
ranë në varrin e hapur e u mbuluan sakaq me dhé. Disa ditë më pas, matrona e përshpirtshme,
Lucilla, i mori trupat e tyre dhe i varrosi me nderim. Perandori Kostandin, sipas
dëshirës të së ëmës, ngriti mbi eshtrat e martirëve një bazilikë madhështore e po
aty, ndërtoi mauzoleun, ku vendosi trupin e Elenës, para se ta çonte për të pushuar
në banesën e fundit, në Kostandinopojë.