Ratko Mlladiç del të premten para Gjykatës së Hagës
Krimineli Ratko Mlladiç, tashmë në Hagë, do të përgjigjet para Gjykatës Penale Ndërkombëtare
për gjenocid, krime lufte dhe krime kundër njerëzimit. Burgu i Sheveningenit në Hollandë
hapi dje dyert për ish-gjeneralin serbo-boshnjak Ratko Mlladiç, i cili mbrëmë u ekstradua
nga Beogradi. Audienca e parë para Gjykatës Penale Ndërkombëtare të Hagës është fiksuar
për të premten. Mlladiç do ta deklarojë veten të pafajshëm, ose jo, për 11 akuzat,
që rëndojnë mbi të. Më e njohura është pa dyshim, masakra e Srebrenicës, në vitin
1995, ku humbën jetën mëse 8 mijë djem e burra myslimanë, por jo më pak, ai duhet
të përgjigjet edhe për rrethimin e Sarajevës, që shkaktoi vdekjen e 10 mijë banorëve.
Zëdhënësja e Gjykatës, Nerma Jelaçiç bëri të ditur se gjeneralit i janë dorëzuar të
gjitha dokumentat dhe i janë shpjeguar të gjitha procedurat, që do t’i nevojiten për
mbrojtjen, para se të vendosej në qelinë e izolimit, siç parashikon rregullorja për
të sapoburgosurit në Sheveningen. I është dorëzuar gjithashtu edhe lista e avokatëve
mbrojtës dhe është vizituar nga një mjek. Ratko Mlladiç mund të përgjigjet para
gjyqit së bashku me aleatin e tij të vjetër, Radovan Karaxhiç, i cili u kap në Beograd
në vitin 2008. Shumë prej akuzave janë të përbashkëta e siç shpjegoi sot kryeprokurori
Serzh Bramerc, 15 akuzat që rëndonin mbi Mlladiçin, janë reduktuar e bashkuar në 11,
me objektiv unifikimin e gjykimit. Edhe Radovan Karaxhiçi duhet të përgjigjet për
11 akuza, që shkojnë nga genocidi te krimet e luftës e krimet kundër njerëzimit.