Impenjimi i Kishës në luftën kundër Sidës kalon përmes sigurimit të ilaçeve për të
gjithë
Fjalët e Papës Benedikti XVI qenë korniza e Kuvendit me titull “Njeriu në qendër,
për parandalimin e trajtimin e Sidës”, i cili përfundoi të shtunën në Vatikan. Ati
i Shenjtë, në mesazhin e tij, kërkonte “të përkulemi si Samaritani i Mirë para njeriut
të plagosur e të braktisur në anë të rrugës”, pasi kjo do të thotë “të zbatojmë atë
‘drejtësi më të madhe’, që Jezusi u kërkon dishpeujve të vet dhe e vë në jetë. Zbatimi
i Ligjit është dashuria”. Takimi u organizua nga Fondacioni “Samaritani i Mirë”, pranë
Këshillit Papnor për Veprimtarët e Shëndetësisë. Kreu i dikasterit, mons. Zigmunt
Zimovski nënvizoi se duhet ndryshuar mënyra e sjelljes ndaj seksualitetit, duke propozuar
një model, që frymëzohet nga vlerat e besnikërisë bashkëshortore e të familjes. Gjithashtu,
duhet punuar që të gjithë të sëmurët nga Sida të marrin falas mjekimet e nevojshme.
Në botë, të prekurit nga kjo sëmundje, që deri dje ishte krejtësisht vdekjeprurëse,
arrijnë në 33 milionë, me 7100 infektime të reja çdo ditë. 10 milion të infektuar
nga virusi HIV nuk kanë mundësi të blejnë ilaçet. Rruga e propozuar nga Kisha është
ajo e një firme farmaceutike amerikane, e cila në vend që të çojë ilaçe në botën e
tretë, ka vendosur të japë falas recetën e prodhimit, në mënyrë që ato të realizohen
në vend. Ose ajo e Bashkësisë së Shën Egjidit, e cila, me anë të projektit “Dream”
(Ëndrra), ka ngritur një sistem asistence shëndetësore kapilare në rajonet më të varfëra
të Afrikës, përmes të cilit ilaçet shpërndahen falas, duke u kujdesuar veçanërisht,
që virusi të mos kalojë nga nëna tek fëmija.