Бэнэдыкт XVI: быць католікам – значыць быць мар’янінам

28 мая Бэнэдыкт XVI прыняў на аўдыенцыі некаторых членаў Кангрэгацыі айцоў мар’янаў з нямецкага Рэгенсбурга. Падчас гэтай сустрэчы Святы Айцец прыгадаў аб тым, як ва ўзросце 14 гадоў, у часы ІІ Сусветнай вайны, шукаючы ратунку ад жахаў вайны, ён быў атулены клопатам членаў гэтай кангрэгацыі.

“Каталіцкасць не можа існаваць без марыйнасці.- сказаў Папа - быць католікам азначае быць мар’янінам. Любоў да Маці азначае, што ў Маці і праз Маці мы знойдзем Пана”. Бэнэдыкт XVI расказаў, што падчас візітаў “ad limina” ён сустракае біскупаў з розных куткоў свету, таму ведае, што людзі ва ўсім свеце давяраюцца Маці, любяць Маці і праз Маці вучацца разумець, пазнаваць і любіць Хрыста”. “Благаслаўлёная ты, таму што паверыла”, - гэтымі словамі св. Альжбеты Святы Айцец падкрэсліў, што “Марыя з’яўляецца вялікай верніцай”, якая “канкрэтызавала веру Абрагама ў веру ў Хрыста, паказаўшы ўсім нам шлях веры”.