Çështja izraelito-palestineze: Netanijahu largohet nga SHBA-të, por dialogu nuk rifillon
Kryeministri izraelit Netanijahu kthehet sot në atdhe, pas një vizite 5-ditore në
SHBA-të. Duke folur dje para Kongresit amerikan, ai u mbylli derën shumë çështjeve
të rëndësishme për procesin e paqes me palestinezët. “Izraeli – tha kryeministri –
do të tregohet bujar me shtetin e ardhshëm palestinez, por nuk do të kthehet kurrë
në kufijtë e vitit 1967”. Kujtojmë se ky plan u paraqit vetëm pak ditë më parë nga
presidenti amerikan, Barak Obama. Ndërkaq, presidenti palestinez Mahmud Abaz deklaroi
se Tel Avivi po vendos pengesa të tjera në rrugën e paqes. Por cilët janë kufijtë
e vitit 1967 e çfarë përfaqësojnë ata? Pyetëm ekspertin italian për Lindjen e Mesme,
Xhorxho Bernardeli: Përfshijnë territoret e pushtuara nga Izraeli, që nuk janë
aneksuar kurrë zyrtarisht gjatë këtyre 40 vjetëve. Janë territore të kolonizuara,
me ngulime hebraike të kontrolluara edhe ushtarakisht nga Izraeli. Në këto 40 vjet,
Izraeli është zmadhuar e shtuar me 250 mijë hebrenj, që jetojnë në këto territore.
Përqindja është e lartë, po të mendojmë se ky shtet ka një popullsi prej rreth 7 milion
banorësh. Kthimi mbrapsht është i vështirë… Po, por edhe këtu, duhet
të kemi kujdes e ta kuptojmë luftën e fjalëve. Natyrisht, askush nuk mendon - madje
as Obama, ose vetë palestinezët – se gjendja mund të kthehet automatikisht në atë
të vitit 1967. Problemi është politik. Netanijahu thotë: “Ne do t’i mbajmë ngulimet
më të mëdha, por jemi gati për disa lëshime të dhimbshme”, pa sqaruar se cilat mund
të jenë këto, gjë që të bën të dyshosh për vlefshmërinë e deklaratës. Ky është një
qëndrim krejtësisht i kundërt me atë të Obamës, por jo vetëm kaq. Bën pjesë në atë
luftë fjalësh, që e lë gjendjen absolutisht ashtu siç është, pa asnjë ndryshim. Sot
për sot, bisedimet për Lindjen e Mesme nuk ekzistojnë. Prej muajsh, negociatat janë
ndalur, pas refuzimit të qeverisë së Netanijahut për të pranuar propozimin e mosndërtimit
të shtëpive në ngulimet e reja. Edhe i dërguari i presidentit Obama për Lindjen e
Mesme, senatori Xhorxh Miçëll dha dorëheqjen javën e kaluar.